歐錦賽周日曲終人散，除咗斯洛文尼亞拎到首冠，季軍戰西班牙以93比85擊敗俄羅斯取得季軍，都有亮點；NBA馬刺中鋒加素（Pau Gasol），因為呢面銅牌係加素累積第7面歐錦賽獎牌，當中包括3金2銀2銅，平前蘇聯名將比路夫、及前南斯拉夫名將高斯錫紀錄。

37歲嘅加素2001年已經幫西班牙拎到歐錦賽銅牌，每兩年舉辦一次嘅比賽，最光輝係2009、2011同2015年幫西班牙拎金牌。加素賽後亦同斯國MVP積格斯等入選今屆賽事最佳陣容，亦喺個人Twitter多謝球迷同隊友支持。