張敬軒演唱會嘅嘉賓，除咗有修哥羅蘭，仲有容祖兒。

Joey獨唱完《笑忘書》後就同軒仔擁抱，佢再大聲話：「你做咩嘢要喊呀！」仲話佢面上有啲淚水。

Joey同軒仔講：「俾面你先嚟呢度，我見到『降兩度』就憎，係樂壇浩劫。我幾晚瞓唔到都因為佢，佢好大威脅，唔好再喺我面前出現。」

軒仔就話：「第一場一定要請呢個閨密嚟做嘉賓。」Joey即攬軒仔叫好姊妹，軒仔問：「好兄弟唔得嘅？我話你知呀，今晚你唔好諗到乜就講乜。」然後軒仔話Joey過兩日生日，叫現場觀眾唱生日歌，又拎咗個果籃出嚟送咗兩粒荔枝俾佢，話佢同荔枝一樣火辣辣。

一聽到自己獲讚「火辣辣」，Joey再食住上：「我o依家好好火呀，你叫番降兩度出嚟battle。」軒仔就講番佢哋兩個以前花名：「叫番深水埗麥當娜，同旺角Beyonce出嚟！」跟住就講番以前點識祖兒，對方點照顧自己。Joey又喺台上笑軒仔，話佢騎刧咗自己首《黃色大門》：「你呀！騎刧咗我呢首歌，心儀乜乜乜。」軒仔即刻再提佢：「你今晚你唔好諗到乜就講乜呀！」

但軒仔識話人唔識話自己。喺多謝其中一個樂手時，軒仔話：「嘩！你今日咁靚仔，成個關智斌咁！」唱《櫻花樹下》又改歌詞，唱「太過堅貞」時改唱「太過捐精」……唉

第一場「HINSIDEOUT張敬軒演唱會」於晚上十一時二十九分完場。