蘇施黃（阿蘇）與同性伴侶金燕玲相愛14載，前半生，各自經歷過高低起伏，下半生，她們選擇走在一起，共度餘生。日前阿蘇接受《蘋果》專訪，記者對着罵人不留情的她真心有點膽怯，但阿蘇對人友善又幽默，令整個訪問的氣氛和諧，提到金小姐，阿蘇落落大方，大談二人的相處，又談金小姐抗癌之路，提到曾經提過要將自己壽命拉長，目的是要照顧對方一生？阿蘇搞笑說：「非也非也，佢係一個好得人驚嘅人嚟嘅，所以我要拉長自己性命，因為我要make sure佢死先過我，因為我驚佢去認屍嗰陣時，是旦一條都話係，佢係咁得人驚，所以我信唔過佢。」

阿蘇05年曾經戰勝癌魔，但卻被類風濕關節炎困擾多年，今年初，另一半金燕玲又不幸患上子宮癌，問阿蘇有埋怨過嗎？她說：「我哋從來都唔會埋怨，每件事都冇埋怨嘅心，咪順受囉，埋怨好難過嘅，快快脆諗吓點過仲好。我覺得我嘅上帝話我聽一啲嘢，妳急呀嘛，就畀個類風濕妳，咁急做乜啫？我覺得係有訊息畀我嘅，個人太過急對身體都唔會好。」共過患難，二人的感情有否加厚？阿蘇笑說：「冇嘅，因為我哋不嬲都好深厚嘅，我哋深厚係各有各嘅，咁先係深厚，我哋嘅深厚唔係日日要對住，深厚嘅係妳去玩妳嘅，我去玩我嘅，大家好開心，而大家又想大家好開心，咁先係深厚。」

金燕玲曾經在阿蘇節目中透露化療後痛到入骨，令她生不如死，而在身旁的阿蘇一直默默支持：「金小姐一病嘅時候第一個諗起我一個朋友，佢身體有4個部位患癌、復發咗8次，朋友們都向佢salute，佢冇呻過半句，金小姐話呢位朋友係我哋一個好好嘅模範、學習對象，我睇見金小姐呢次真係好辛苦，要恭喜佢，佢啱啱做完第6次化療，第一次嘔到不得了，之後知道要早啲食藥，就冇嘔，但係之後啲骨開始越嚟越痛，去到第6次，我望見佢都知道佢已經好謝嘞！佢好鍾意出街，一好少少就會出去，今次係冇出過街，你可以知道佢係好病！頭髮甩晒、眼眉甩晒、眼睫毛甩晒、全身嘅毛都甩晒，佢話平時畫條眉用5分鐘、10分鐘就畫好，而家要用半個鐘，因為冇眉畫呀！好難畫呀！7月5號就做電療，要喺身體內部做，所以要做全身麻醉，因為驚會郁、又驚會痛，所以做4次全身麻醉，真係幾攞命，希望快快脆，7月中全部嘢做完，好好嘅朋友都約晒同佢慶祝。」

為免令養病的金燕玲煩躁，阿蘇不敢貼身照顧，她笑說：「金小姐好正面，我哋喺屋企係相反嘅，我篤信中醫，佢篤信西醫，當大家病嘅時候收聲當幫忙，唔好令佢覺得煩躁，信西醫咪信囉，唔會叫佢食乜嘢中藥。我哋而家有個group叫麻雀能醫百病，佢一好啲就會喺個group度搵人陪佢打麻雀，啲朋友好sweet嘅，我就做第5隻腳，佢一攰我就同佢打幾局，佢都好開心嘅。」

其實阿蘇與金燕玲同樣有脾氣，究竟兩座活火山如何維繫？阿蘇想也不想便說：「只要兩個火山擺開啲就得囉！其實我哋相處冇乜嗌交嘅，都OK嘅，因為我哋好少見面，自己做自己enjoy嘅嘢，見自己鍾意見嘅朋友，大家有個伴，我哋食飯、睇戲都要約㗎，其實係有個相處之道嘅，大家開開心心。」

早於9年時曾經承諾10年賺夠2億後可照顧金燕玲餘生，阿蘇笑說：「而家負兩億呀！件事係你化咗，當然未達標啦，以一個唔識做生意嘅人點達標呢？其實2010年時我係學做生意，學咗9年，只得一間曲奇店，而家會覺得搵唔搵到呢啲錢係其次，最重要係喺呢10年裏頭，能唔能夠將學到嘅嘢帶畀你嚟緊日子，真係可以有信心養活到你餘生，我好有信心，但係我好鍾意工作，希望可以做到瓜老襯嗰日，好開心㗎！」

阿蘇廣結人緣，圈中朋友多的是，已故的張國榮、關之琳、黃子華、張智霖與靚靚都是阿蘇的密友，性格火爆的阿蘇絕不怕得罪人，她說：「如果佢俾我鬧完，佢嬲我嘅話，咁都冇辦法，佢係知道我對事唔對人，佢係明白我嘅初心係乜，唔明嘅都冇辦法，大家交唔到朋友，如果佢係明嘅、又知嘅，佢用粗口媽叉我都可以，嗰啲就真係我嘅朋友。性格冇得改嘅，你叫我變做轉彎抹角我又做唔到，咁我由細至大有乜就衝出嚟，對任何一個人都係咁，除咗對爸爸媽媽、家姐阿哥，對佢哋有種長輩嘅（尊重），其他平輩嘅就弊嘞，哈哈哈！」

人生已走了66年，阿蘇謂目前的人生已無慾無求，坦言視回饋社會作為新目標，她說：「最近有件事發生咗，喺瑞典有一個過千個科學家開咗個會，大家都知道地球暖化，真係病病哋，而呢班科學家出咗報告話2020年大家仲唔做啲嘢，地球會返唔到轉頭，我覺得自己有少少責任，地球變成咁，唔關啲小朋友事，因為佢哋都未開始用個地球，但係呢個地球畀我用咗60年，可能喺70年代經濟起飛，大家開始有錢，大家喺食嘢、旅遊、學校都開冷氣咁，報告指大家做乜都冇用，最有效嘅係全世界嘅人去改變飲食，飲食習慣係食嘅肉每日只可以佔4%，我係食肉怪，死嘞！真係想做啲嘢，但唔容易，而家希望召集有心人同我一齊諗點樣改變自己飲食習慣，唔好剩返啲殘渣畀我哋嘅下一代，嚟緊呢段日子，我會攞100%甚至200%心機落去，點樣可以留返丁點好嘢畀下一代。」

蘇施黃最近為ViuTV主持的全新旅遊節目《厲害了！蘇哥兒》，到鹿兒島拍攝15集特輯，以體驗的方式探討當地人的文化，阿蘇說：「佢哋搵我嘅時候，我話我唔再拍旅遊節目、唔拍煮嘢嘞，我會諗點解有一個咁多天災嘅地方，點樣成日冧咗都能夠企返起身？我同監製講去拍吓點解日本會咁犀利，所以節目個名叫『Sugoi』，我去拍佢哋嘅成長、文化，所以去邊度都冇所謂，鹿兒島我未去過，我係京都超級fans，叫我移民京都我唔得，但叫我移民去鹿兒島，我覺得得！佢環境真係好靚，我覺得應該叫『綠怡島』。」

其中阿蘇走訪日本的學校體驗，日本人對小孩的人民教育令阿蘇讚嘆，她說：「我希望廣大的市民一齊去睇，我哋拍咗當地嘅學校，由托兒到中學，香港爸爸媽媽應該要學會放手，佢哋返學時間彈性冇壓力，係好人性化嘅一樣嘢，日本嘅學校係幫輕啲家長，而唔似香港嘅學校，係畀壓力家長同小朋友，小朋友好獨立，我好impress，佢哋好開心，大家可以睇吓當地嘅小朋友同香港嘅有咩分別。」

阿蘇與操流利廣東話的日本人和泉素行（Soko）同行，阿蘇保持一貫聲大夾惡作風，以鬧行先，阿蘇笑說：「我可能習慣一個人做，我好快嘅，所以會急啲，去到真係日日都鬧，由頭鬧到落腳，當我心情好嘅時候會解釋畀佢聽，會分享畀佢聽要喺呢行企得穩係點，佢好大方嘅，鬧完佢之後仲係好客氣，我會緊張佢，佢寫中文又寫到，國語、廣東話、日文都好，發展點只係咁呢？我覺得佢係一個好叻嘅人，只不過冇好好咁將嗰幾樣嘢用得淋漓盡致，畀咗我就好開心嘞！所以我會肉緊啲，咁肉緊啲拍嘢就真係鬧到佢趴喺度，我同任何人做嘢都鬧到佢趴喺度㗎！啲Cameraman講笑，我都會同佢講『講乜嘢笑呀？講笑做完嘢先講！』我就係咁討厭㗎嘞！」

採訪：羅慧敏
攝影：沈健程
攝錄：馮嘉銘

------------------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X