老友F到廣州一行，聽當地朋友推薦，到珠江江畔一間西餐廳試菜，果然一流。不過廣州朋友對老友F話嗰間餐廳叫做「那星」，老友F聽到一頭霧水，心諗邊度會有人咁樣命名㗎，尤其是喺廣州㖭，「那星、那星」，好容易變成粗口喎！後來到咗「那星」，不禁大笑，因為佢見到招牌寫住LeSeine，廣東話譯為「那星」，又幾似噃，比較文雅啲嘅繙譯，要請教法文通陶傑至得。Seine就係橫越巴黎嘅「塞納河」，騷人墨客在塞納河左岸，必曾留下不少遺迹。廣州珠江自然難與塞納河相比，不過廣州市政府勵精圖治，要清理珠江；清除污染穢氣，聽講初見成效，河水漸清，將成為廣州美景，在江邊開西餐廳，以LeSeine為名，有大志也，可惜用廣州諧音讀起嚟，格調就降幾級。

老友F試完西餐，甚覺滿意，想話夜遊珠江，朋友話暫時搵唔到船，明朝先可以安排。於是第二日中午飲完茶就去到河邊上船，咦，隻船好新淨，有型格，用來招待外賓，唔怕冇睇頭。老友F心念一動，想見吓船長問清楚航程，沿途有乜勝景。朋友帶老友F去搵船長，船長踎響船頭食煙，煙灰滿布船頭，老友F已覺得唔開胃。朋友嗌一聲，船長手指一彈，丟煙頭落珠江，企起身，轉身過嚟，正面面對老友F，嘩睇真吓，船長件白上衣好多油迹，黑手指印噃。船長問：「有乜指教？」老友F話：「冇嘢咯，冇嘢咯。」掉頭鬆人，因為佢想起陶傑講甲午戰爭前嘅日本海軍長官參觀中國軍艦嘅故事也。