有讀者經營業餘網上拍賣，早前在紅磡灣郵局以平郵包裹形式，寄出八件總值逾二千多元的拍賣品予八名成功競投者，最終卻寄失六件，只獲郵政署斟情安排退還約六十多元郵費，更令其在網上拍賣平台上的誠信受損。

「雖然我有證明書證明我有寄出公仔，但我好辛苦先儲到信用評級有成三百幾分，咁樣一次過有成六個客收唔到我寄出去嘅公仔，畀人誤會我唔老實，我嘅誠信都受到好大嘅損害㗎！」
業餘經營網上拍賣多年的溫小姐表示，她於上月二十七日至二月一日間，曾三度往位於黃埔花園的紅磡灣郵局，以包裹形式，平郵寄出公仔（拍賣品）予八名競投者，郵費每個約需十元，她並同時支付一元二角以獲取「投寄非掛號郵件證明書」作證。一般而言，收件人可於寄出包裹後一或兩日收到。

覆核地址並無出錯
但是，她寄出後，陸續有競投者表示仍未收到包裹。她即時覆核地址，並無出錯。「我一直都係咁樣寄包裹畀啲競投者，咁多年都冇出過事，但今次八個客中竟然有六個收唔到，其中有幾個客重係買咗四、五個公仔，每個二百幾蚊，總數成千幾蚊，我都唔知點同人哋交代。」
她表示，行內不成文規定，若競投者成功交收後，多會返回拍賣場，滿意者會對賣家投以「正面」信用評級，每次一分；反之則投以「負面」信用評級，及加上惡評。