和黃大班霍建寧噚日抽空喺港大一個研討會主講,呢個研討會嘅題目係「創意都市」。霍大班話:「生意兩個字其實係靈活、意念嘅含意。善用創意係和黃創造盈利、成功拓展業務嘅其中一個重要關鍵。」
佢列舉集團旗下各部門代表作,好似黃埔花園以大輪船作購物商場;又例如當年喺英國推出Orange業務,當同事話畀佢聽嗰品牌叫做橙,搞到佢差啲跌落地。
以霍大班年𢭃逾億元酬金嘅條件,邊個可以請得郁佢去講幾個鐘talk?原來係大班嘅大班,事關呢個研討會係李嘉誠基金贊助、汕頭大學合辦。
講述如何善用時間
臨走前,霍大班話李嘉誠基金特別買咗一批書畀記者,都係講創意無限嘅,書名叫《別從老鼠身上擠奶》;有攝記大哥口快快講咗「揸奶」,即時俾霍大班糾正。
八方粗略睇過本書,大意係教人如何喺講求速度同效率嘅現代社會中善用時間。作者李度柏(LeeSilber)亦係一名創意大師,身兼作家、鼓手、工作坊領導人同廣播節目主持人;重創辦咗五家企業。
傳真︰2623-9278
電郵︰[email protected]