上月踏入30歲嘅韓國「國民妹妹」始祖文根英，今年2月因患上急性骨筋膜室綜合症（Compartment Syndrome）導致工作全面喊停，佢亦先後做咗四次手術。今年4月時，文根英方面嘅相關人士就公開咗佢嘅新相，精神相當好，似乎好返好多。

而今日文根英就更新咗Instagram，係佢患病後首次自己公開近況，令粉絲相當開心。文根英喺IG上載咗一隻杯，並表白心境感謝粉絲：「喺我過去嘅成長過程中，一直有人陪伴我，默默守護住我，亦包容我唔完美嘅選擇，甚至喺我好傻嘅時候仲為我應援，對於呢啲事，我真係非常感謝。」文根英又加上「我好好，唔使擔心，比起對唔住，我更想講聲多謝」標籤，表達自己嘅近況。