廠商會舉辦嘅工展會又嚟嘞，除咗搶購一蚊優惠，更吸引到大家眼球嘅梗係個工展小姐選舉，大會今日率先畀傳媒睇睇今年10位工展小姐嘅風采，仲叫班佳麗數白欖......吖，唔係，係Rap番個freestyle，齊齊甩吓嘴、郁身郁勢hardsell吓工展會。

一眾工展小姐全部都係唔同參展商嘅市場部代表，但今年最搶鏡嘅肯定係2號佳麗、來自深偉國際有限公司嘅梁綺婷，點解？因為佢話參賽唔止係想幫公司宣傳，仲要為佢母校增光。原來佢本身都係廠商會旗下中學畢業，仲攞過獎學金，佢話喎，多得廠商會培育咗佢嘅成長，如果攞咗工展小姐就意義非凡，「正正係廠商會完美咗我嘅上半生」。

嘩，講到廠商會有養育之恩咁滯，唔知o氹唔o氹到班評審投佢一票呢？