唔少股民等內地A股調整等到頸都長，近排終於似似哋有調整。A股滬綜指噚日跌1.7%，之前日日升停板嘅券商股、基建股，都係跌2%至4%，調整相當溫和。香港上市H股之前升就升唔足，仲要係大落後，到而家A股開始似似哋落，H股反而唔係點跌。
A股同H股近兩日跌市都比想像中硬淨，係好現象，強勢呢吓嘢，背後永遠都有道理。
不過，晉佳依然估計，內地A股呢一轉調整可能跌得比市場想像中多，調整都要跌到有人驚，有內地散戶舉白旗投降，A股先至肯見底。但係，強勢中資H股以至H股指數，又可能比想像中跌得少，藉此拉近兩地差價。換言之，H股強、A股弱，會持續一段短時間。經過調整市，令A、H差價平衡一點，中資股就重新出發。單睇H股，唔值得盲目睇淡。
如果睇個股走勢，後市的確不容太悲觀。除咗上星期講過鞍鋼（347）、中鋁（2600）之外，早前推介過嘅龍工（3339）都做緊圓底，即使睇近排強勢嘅中交建（1800），之前突破8蚊嘅潛伏底頸線，成交增加，爆升里程似有排未完。

短線睇圖個市好似難玩，但長線睇圖嘅話，似乎好多隻股向你招手，叫你買定離手。
要確認中資股升市，最穩陣係H指明顯突破12000點，即係2011年歐債前重大支持、歐債後重大阻力位。近幾日H指守喺呢個水平，9月至今亦似形成杯柄形態，利好。等到A股調整完，一企穩，H股指數已經明顯突破12000點，強勢H股可能一去無回頭。
市底強，理論上要增持，但又驚睇錯，短線操作又唔多強，咁可以穩陣啲，選擇分段買，一來捕捉調整浪，好難撈中個底，二來就算睇錯市，原來最終係跌市，分段買嘅中途，未買齊貨，輸都輸得冇咁甘。
另一種方法，就係留意身邊炒股嘅朋友，如果身邊大部份炒友呢個時候喺度遲疑、避險，最好嘅方法就係……買得多過佢哋。呢一點，閣下自己觀察吓吧。
去到要買貨嘅時候，最好買乜？大把選擇，太保（2601）、民行（1988）同中交建，喺近兩日內地A股跌緊時，佢哋仍然硬淨，要買一二線股份，就應該喺呢幾隻裏面揀。要揀二、三線中資股，就揀突破圓底、潛伏底頸線嗰批股份吧。

晉佳
http://www.facebook.com/pages/晉佳/719009541518415
本欄逢周二刊登