日本組合AKB48嘅師妹組合HKT48,今年曾經喺東京明治座做咗個融合古裝舞台劇同演唱會嘅演出「HKT48指原莉乃座長公演」,場場爆滿,於是佢哋噚日就移師返到HKT大本營福岡演出。各成員喺舞台劇入面扮鬼扮馬,身為一姐嘅指原,仲扮老鼠,被其他成員縛起。
而入場前例牌有大堆紀念品發售,要粉絲畀下錢,而今次指原仲出埋湯烏冬,粉絲去到現場肚餓的話,就可以食碗指原嘅牛蒡天婦羅烏冬,上面塊魚片仲有個「指」字。牛蒡天婦羅係福岡名菜,HKT仲有個節目叫《HKT牛蒡天婦羅》㖭。
而指原隊友兒玉遙,今次演出要扮男仔,仲有咀隊友戲份,佢話媽媽同啲親友都嚟睇,所以做咀嘴戲份時好緊張喎。