【隔牆對論】
「碼頭風雲」席捲全城。貨運業繁榮背後，是工人被困在起重機內吃、喝、如廁，無盡辛酸只換到不合理回報。
今日罷工第十天，52歲的船上抓結員明哥坦言，最無奈是當經濟好轉，但「個個出左半斤力，拎唔返八兩」，「唔係今次罷工，都唔知自己一路俾人呃！」759阿信屋老闆在今次工潮有輕微損失，但他不認同資方指罷工拖垮經濟，「如果真係有影響，政府一早出咗手啦！呢啲係商業糾紛」。
記者：姚國雄　張嘉雯

呢啲係糾紛　唔會拖垮經濟

記：《蘋果》記者　林：759阿信屋老闆林偉駿

罷工工潮拖慢貨櫃交收，受影響的公司正考慮轉用深圳港口及本港其他貨櫃碼頭，阿信屋早前也有約20個貨櫃延期到港。
記：如何看今次工潮對你的影響？
林：我哋未有好實質嘅影響。零食影響最大係蛋糕、紅豆餅，因為呢啲食用有效期係45日，惟有捐出去，唔會嘥嘅，可能損失幾萬蚊。不過算啦！工潮冇耐先一次，我冇乜嘢意見，可以去嘈邊個呢？呢啲當係天災，當落場大雨，啲貨浸濕晒，做生意有時係有天災，但呢次唔係人禍。

國際貨櫃碼頭（HIT）董事總經理嚴磊輝不斷強調工潮拖累本港經濟，態度強硬，稱自己並非工人的僱主，叫工人想加薪應去找外判商。
記：你受工潮影響，如何看嚴磊輝的言論？
林：罷工幾時會搞冧香港經濟呀？六七暴動都冇『搞冧』香港啦！如果真係有影響，政府一早出咗手啦！呢啲係商業糾紛。如果佢真係覺得會拖垮香港經濟，咁就應該早啲出嚟做嘢。
我唔識李嘉誠，但佢80幾歲，佢（嚴磊輝）見到老細咁俾人指住嚟鬧，老人家連去拜山都要俾記者騷擾，做夥計應該快啲幫老細頂，佢認真抵打。
記：外判是否一定剝削工人？
林：台灣、大陸、全世界好多工序都會外判，係咪工序外判都有問題呢？例如我做零售，某程度上都係「外判」，幫生產商賣貨出去，但唔係壞事，呢個制度係需要存在，因為有啲工種係難於管理，但唔係代表公司可以將個將責任卸出去。
記：你同情工人嗎？外判商是否該向他們加薪？
林：工人要喺高空嘅吊機上大小二便，環境真係好惡劣，工作地方係咪可以好啲？唔係你都幾難搵人入行。改善咗個環境，隨時唔使人工咁高都請到人。佢（嚴磊輝）應該去睇吓個廁所，佢見到可能會覺得好惡心。我唔想透露有冇捐錢，我知道個戶口冧巴。我認為工人罷工要幫，因為佢哋一家都要開飯，我唔係鼓吹罷工，只係想減少怨氣。我覺得人工未必係大問題，雖然工人話10年冇加過人工，但係倒番轉頭諗，係咪10年前嘅人工高到唔合理呢？工資係由市場調節，你試吓今時今日用800蚊一日，睇吓請唔請到扎鐵工人囉？

碼頭工潮激起反李怒潮，有民間團體組織發起罷買百佳，希望藉此向李嘉誠施壓，逼他回應工潮。
記：如何看「罷工」或將會演變成「罷買」？
林：呢個只係宣泄情緒，搞工運都係想令到工人想要到佢哋嘅嘢，呢件事最緊要佢加人工，工人加到人工就贏，仇富係冇意思。

林偉駿自認左傾，兒時見到電車工會廉價賣豬肉，對左派產生景仰。他9歲工作，曾罷過工；做老闆後，也應付過內地廠房的罷工浪潮。物換星移，碼頭工潮，工聯會被指「潛水」，屬下的工會理事原來是外判商的中層管理人員。
記：你如何看工聯會今次表現？
林：工會一向係左、右兩派，你搞我唔搞，睇吓邊個工會「捉到」。佢（工聯會）搞唔起，人哋（職工盟）覺得搞得起。今次事件有人判斷差咗啲。
記：做老闆應如何解決勞資糾紛？對老闆來說，加薪是否那麼困難？
林：我喺內地工廠都有勞資糾紛，首先應將激烈啲嘅人捉開佢慢慢傾，等嗰啲冇咁激進返去開工。如果糾紛拖得長，唔激烈都變激烈，觀望嘅都走埋去參加，結果越來越多人加入。有同事總愛牽頭搞工運，老闆應平時同呢班人搞好關係。
工會唔係一件壞事，早啲畀員工知道自己權益係好事，等做老闆嘅都可以聽到唔同聲音。
近日日圓貶值，我趁機加人工，刺激吓員工士氣。夥計賺到錢買到嘢畀仔女，做人自尊都高啲，唔好等佢哋搵朝唔得晚，夥計唔安心，你「盞搞」！老闆要明白勞動力係有價值。

咁多人撐　真係流眼淚

記：《蘋果》記者　明：碼頭工人明哥

由97年至今，碼頭工人的薪金跌跌升升，至今算是原地踏步。連日罷工，公眾開始明白到工人低薪背後的辛酸：24小時一更、操作起重機的「龍手」長期彎腰低頭吊貨櫃、一日三餐、大小二便要在空中「解決」、所謂的「休息室」殘破不堪、儲物櫃發霉生銹、工人的日薪部份被扣起，交給外判商開設的食肆作所謂的「包伙食」……
記：待遇奇差，人工不理想，何以忍到今天才罷工？
明：入行嗰陣有$1,480一更，五個人一組做嘢，𠵱家得四人一組，仲要減人工，之前經濟唔係咁好，咪同你捱落去囉。
𠵱家外面加咗人工，我哋仲停留咗喺度。物價高漲，𠵱家貨櫃量多咗好多，人又少咗，外判商又無情，叫我哋「唔撈咪走囉」，冇乜商量餘地，所以先至要罷工。
記：為何不轉行？工種太易被取代？
明：冇乜讀過書，想轉工轉乜嘢工呢？呢行做熟咗嘛，都算係專業，佢哋出面要即刻搵到班人入嚟取代我哋唔係咁易。咁長時間、冇得屙屎㗎喎，邊個肯入行呀？我哋仲要咁危險，七成時間都留喺（起重機）度，同坐監冇乜分別。出面𠵱家做雜工，都有三、四百蚊八個鐘，地盤都有六百幾，我哋想要求五百蚊都冇呀，得410蚊，仲衰過地盤！掃垃圾都成萬蚊啦。

首富李嘉誠旗下公司外判成風，06年百佳超市新鮮食品部外判，令500員工飯碗不保；最近屈臣氏蒸餾水送水服務外判又炒百多人。財團以「外判」為由跟工人劃清界線，碼頭公司董事總經理嚴磊輝不斷重複他們沒身份跟工人談工資，打發他們找外判商商討，又指摘工人罷工令他們每日損失500萬元，叫工人別影響香港航運業的國際地位。
記：公司何時開始外判？怎看嚴磊輝？
明：我97年入行嗰陣已經係外判，但我𠵱家先知李嘉誠係老闆，老闆就老闆囉，我哋都係接柯打做嘢，有柯打就返工，冇柯打就冇錢，其他嘢我都唔知㗎，𠵱家先識嚴磊輝呢個人，對於社會人士嘅評論，我唔識㗎，咁啲有錢人，做慈善就認啫，衰嘢冇人會自己認。我哋係文化低嘅，但都知身為一個人，都應該出黎交代吓，你養隻狗，隻狗出嚟咬人，點可以話唔關你事？有啲嘢你要負責就負責。
記：怎回應罷工影響他人？
明：唔係我哋影響其他人，係李嘉誠影響緊我，我哋唔係破壞你啲野，又唔係令其他人無法運作。
記：政府斡旋是否足夠？
明：我情願英國政府管番，以前啲判頭都唔係咁嘅，回歸咗之後又外判，外判又多蠱惑招，中間食到盡、左手交右手，香港政府好嘅嘢又學唔到，中國衰嘅嘢就學到足，又貪污又官商勾結。

罷工踏入第十日，連日來最多有2,000市民到碼頭打氣、罷工基金籌款數目破200萬元。社運人士發動全港18區罷買百佳向李嘉誠施壓。
記：點睇巿民支持？
明：唔係今次罷工，都唔知自己一路俾人呃，同埋唔知巿民咁支持我哋，好似一家人咁。開頭我哋都想放棄，但係巿民越撐越多人，好多人聲援。我哋十幾年嘅嘢追唔返㗎喇，但係希望下一代嘅環境可以好啲，長期咁落去，香港死梗㗎。
個個出咗半斤力，拎唔返八両，以前香港人仲可以做小生意，𠵱家連開飯錢都唔夠，咁逼我哋，不如去攞綜援啦，不如政府養，好過李嘉誠養！
記：今次罷工對你有乜嘢改變？
明：最大收穫係低下層原來好團結，以前唔知乜嘢叫工會，唔知有人會幫我哋出頭。有一日有千幾個學生嚟撐我哋，我真係流眼淚呀，咁多日喺碼頭，佢哋好關心工友，同我傾偈，我16年嚟都未講過咁多野，仔女都冇咁關心我呀。


mailto:[email protected]