家陣興講「十一.五」規劃,煲呔都唔執輸,特別喺今日911,搞咗個「十一.五與香港發展」經濟高峯會,對特區政府而言,擦吓中國計劃經濟鞋,以示接近國情,點都好過悼念美國嘅災難。但對習慣自由經濟嘅香港人嚟講,十一.五係乜唔會好多人知。
其實十一就係第十一個,五就係五年計劃,中共建政之初學蘇俄搞計劃,於是有第一個、第二個五年計劃,現在就係第十一個。大家可能會問點解啲年數唔啱嘅,好簡單,因為有段時間中國亂過亂世佳人,咪冇咗。
究竟今日壇嘢會講咩?原來都好多喎,例如喺基建方面,政府使唔使建立一個高層次嘅跨部門統籌協調機制呢?又例如香港點先可以發展成為區域教育樞紐?當局又點繼續推動CEPA,令更多中小企受惠等等。