賭王何鴻燊四太梁安琪、女兒何超盈、教育局前局長孫明揚與莎莎老闆郭少明等，昨晚在北角新光戲院出席「保良局慈善粵劇晚會」，身為董事會主席的梁安琪不但捐錢支持，更粉墨登場客串演出鳴芝聲劇目《搶新娘》，梁安琪於開場前以便裝接受訪問，處女下海演粵劇的她坦言心情很緊張。化淡妝的超盈着白色針織衫現身，於開場前及時趕到，衝入後台搵媽咪，沒有停步接受訪問。
四太大呻因工作忙沒時間綵排，並自嘲說：「點練？邊有時間，蓋鳴暉唱得咁叻我點敢開聲，講嘢都差啲俾人掟雞蛋，所以只會上台講嘢，鍾意就開金口。」

賭王支持首開金口

問到四太賭王是否喜歡睇粵劇？她說：「佢好開心，仲好想嚟，頭先喺屋企陪完佢，或者化完妝影相畀佢睇，或者hold住妝返去畀佢睇，天氣差空氣差，所以唔想阻佢。」問有否跟何生唱歌？她說：「有練，佢同蓋鳴暉、芳艷芬唱過，何生唱得正，我就唔得，所以今日化妝做個樣。」
問賭王有否唱情歌給她聽？梁安琪甜笑說：「有。」再問是否唱英文情歌？她避答：「講完未？好凍呀！」至於母親節，她透露跟子女食飯慶祝，收到蛋糕之外，超盈還用花砌禮物送給媽咪、八姑媽和奶媽，問何生有否送禮物？四太說：「何生話母親節唔關佢事，所以細路畀禮物。」
此外，莎莎老闆郭少明表示未睇過四太做粵劇：「有興趣睇，好似龐盧淑燕都跟大師傅學，自己唱K還可以，粵曲唔得。」
採訪：林嘉慈
攝影：葉君海