將軍澳中心就快入伙,發展商最近又發功催谷銷情。美聯物業助理營業董事李志誠對蘭西講,個盤吸咗唔少東九龍同港島東嘅客。佢重講咗啲有趣成交畀蘭西聽。一對在柴灣杏花邨居住嘅夫婦,同女方家人一齊睇將軍澳中心,最後齊齊入市,重買埋同一座樓上樓下共三個800幾呎嘅單位;入市原因係個盤有地鐵同會所,保值能力較強。
另外,一對分別在筲箕灣東大街,同薄扶林華富邨居住嘅兄弟,亦都買咗將軍澳中心同座嘅樓上樓下單位。
李志誠解釋,唔買隔籬單位,主要係左右單位個景已經唔同晒。
親戚朋友一齊入市嘅情況,喺將軍澳中心較多,原因係樓盤價錢平,可以負擔得起嘅買家較多。
佢又話,未有現樓睇之前,個盤以內園單位最好賣,入伙後,去貨最快就係5同6座嘅A同H室。
催谷擎天港置送水晶摩天輪
尖沙嘴擎天半島開售日期愈嚟愈近,代理近排密密為樓盤大搞吹風會,香港置業製作一套片長三分四十三秒嘅MTV推介樓盤,又訂做水晶摩天輪,送畀首十名透過該行入市嘅買家。
今次港置送水晶摩天輪,因擎天半島可以眺望於05年落成,高75米,位於海運大廈,是全東南亞最高嘅摩天輪。水晶摩天輪嘅造形有兩個方案,其中一個係立體水晶摩天輪,另一個方案係喺方型水晶中刻上摩天輪圖案。最終定案要等製造商回覆,有興趣買呢個盤嘅市民要耐心等待。