韓國女團f(x)嘅前成員Sulli，之前因為掛住拍拖唔做嘢，搞到唔理團隊活動，加上拍拖後性情大變，不時喺Instagram晒性感相，又成日被發現唔戴bra，令外界對佢嘅行為都大感奇怪。

而喺前日播出嘅MBC節目《Section TV演藝通信》中，記者就重提Sulli當時喺f(x)時嘅工作態度，當中記者大爆喺2010年時，曾採訪過當時剛出道嘅f(x)，雖然成員之間都好攰，但接受採訪時仍然十分專業，唯獨Sulli就好例外，雖然同其他成員坐喺梳化上，但Sulli就明顯心不在焉，一直做其他嘢，同時又表現出好攰嘅樣子，所以記者話佢採訪時就直接冇理會Sulli。

另外，另一名記者對於Sulli喺Ig上嘅照片及發文就表達意見，佢認為Sulli嘅形象如果被打破就無法生存下去，同時又指Sulli喺金秀賢主演嘅《Real》上映後，係唔係能夠以演員身份繼續發展下去就仍有待觀察，不過因為佢以前一直以歌手身份發展，演技方面如何仍有待分曉，如果連演員條路都走唔下去，咁佢就會成為一個大麻煩。