陸詩韻噚晚喺圓方出席一個紅酒活動，有一段時間冇拍電視嘅陸詩韻，最近有份參與《深宮計》嘅演出，雖然佢飾演嘅宋王妃戲份唔多，不過都受到注意，佢話：「朋友話霸氣，其實都係做番自己，不過我好鍾意做反派，覺得好有挑戰！」

之不過有報道話喺劇集同羅霖撞樣，陸詩韻就話：「女大18變啫，o依家啲醫學美容咁先進，而且化妝都可以幫到手，根本都唔需要去整容，證明我係靚咗，不過我都唔介意人哋話我整容。」稍後陸詩韻會為好友李美慧做伴娘，佢話：「原來我都做咗10幾次姊妹，做到有啲攰，我哋都有同一對新人開過會，新郎話唔介意，叫我哋盡情玩！」

陸詩韻話婚宴喺下晝舉行，大家應該唔會玩得太癲，唔知係咪李美慧係咪雙喜臨門？佢即刻話呢啲最好問番一對新人！至於到時同舊愛曾文能（曾文豪細佬）同場，佢就話：「唔介意，我哋間唔中都有聯絡。」

精選娛聞，喺晒《娛果》
http://fb.com/appledailyent