周柏豪做藍神表忠惹歌迷怒碎珍藏唱片 IG急跌4萬followers
蘋果日報 2020/12/25 00:24
周柏豪奶共陳百祥表忠藝人TVB
周柏豪過去幾年政治立場左搖右擺，一時被大陸小粉紅指他是「港獨豪」，多次出騷受小粉紅狙擊，周柏豪先後在社交網積極表忠，發表「感激自己成為一個中國人」跪玻璃論，可惜成效不大，日前他接受陳百祥主持的親中網媒訪問化身「藍神」，被罵是「潛行雙面人」，刻意在節目中談及2014年與黃之鋒合照一事，表明「割席」稱不認識他，講起外國制裁中港官員，他更發表「阿媽教仔」論，感慨現時年輕人不了解中國大陸，直斥去年社會運動中暴徒行私刑。
比比鳥瞓身入深藍營，他的表忠行為傷盡忠誠歌迷的心，原本在IG擁有151萬的追隨者即急跌至148萬，兩日內流失3.5萬名追隨者，再到下午，人數再跌多1萬至147萬。不少歌迷選擇與周柏豪「割席」，用半小時將自己儲藏多年的CD及VCD剪碎，並把照片放上連登討論區，當中全是劃花了周柏豪多年的靚仔相及VCD的碎片，歌迷更在珍藏中寫上「香港唔需要你呢啲偽人」、「沒良心、沒良知偽人」、「周柏豪不了，香港人之恥」、「奶共不了」。
歌迷亦留言表示對周柏豪失望，「原來人生覺得最爛的事情，也未必是最糟，因為最糟的，可能一直就在眼前而未曾發現」，歌迷對柏豪的失望的反應猶如前年「藍校長」譚詠麟撐警後，不少粉絲打爛他的唱片一樣，以行動表達對偶像徹底心碎。
不少連登網民留言附和，有人貼柏豪潮牌的tee，網民表示應該「一把火燒埋佢啦」，另有網民：「香港沒有樂壇，只有娛樂圈，9成奶」、「冇鍾意嘅藝人就無呢個煩惱」、「個種失望程度係直頭唔想再見到呢個人」等。
林卓廷叫周柏豪讀多啲書
前立法會議員林卓廷今日在YouTube個人頻道評論周柏豪，指他應多讀兩類書，分別是《伊索寓言》及中國近代史，直言周柏豪是《伊索寓言》中的蝙蝠：「當飛鳥類佔優時，蝙蝠就去飛鳥類助權，話自己係鳥類悍將，去幫手打仗，到戰況逆轉時，佢走行埋去走獸堆，扮老鼠啲friend，話自己係走獸，打完之後，兩派和好，兩派共同敵人就係蝙蝠，自此蝙蝠只可以孤零零匿喺山窿生活。」
他指出周柏豪用錯了「阿媽同仔」嘈交的比喻來形容香港同大陸關係：「根據憲法同基本法，香港以行政長官為核心，行政主導，能夠代表香港只有係林鄭月娥，你而家話阿媽同個仔嘈交，係咪話林鄭月娥同習近平嘈交呢？」他溫馨提示他應留意中國近代史，當年國共大戰，共產黨不滿國民黨，而蘇聯有份幫共產黨提供軍備，令國民黨遷台：「我唔係講要求引入外國勢力，侵略我國國土，只係同你講中國近代史發展，可能你過往讀得書少，唔緊要，多啲讀書，唔好跟叻哥睇咁多《精裝追女仔》，多啲讀書對佢有幫助。」
此外，藍奕邦繼在IG unfollow周柏豪後，昨晚凌晨再貼相暗寸對方：「就算你要墮落，都懇請保留一丁點格調。」不少網民附和：「我怕你寫繁體字，佢已經睇唔明」、「有格調咁墮落，用跳水比喻，簡直係向外翻騰4周半」、「人變咗就變咗啦」等。
粉絲將多年周柏豪的靚仔相劃花，把VCD珍藏打碎表達失望。（網絡圖片）
粉絲更學周柏豪的「大文豪」文字風格，表達對周柏豪的失望。（網絡圖片）
有粉絲附和，揚言要燒埋多年以前買落周柏豪創立的潮牌tee。（網絡圖片）
周柏豪的IG followers原有151萬。（網絡圖片）
變身「藍神」後，IG followers 人數短短兩日急跌至148萬，流失了3萬5千名粉絲。（網絡圖片）
到下午，周柏豪粉絲人數持續下降，下降至147萬。（IG截圖）
林卓廷指周柏豪讀得書少，叫他多讀《伊索寓言》及中國近代史。 （網絡截圖)
藍奕邦今日再出帖文暗寸周柏豪。 （IG截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！