菊梓喬今日喺會展出席活動，講到今日係冬至，佢表示因爲感冒，今晚會留喺屋企休息：「聖誕節唔使開工係最好嘅聖誕禮物，可以休息吓，同埋要忙新碟宣傳，又要出席頒獎禮。」問到有冇人約佢慶祝聖誕？佢話：「會返公司同同事開party，（有冇男仔約？）今年冇，我唔鍾意出街，我有狗狗陪，唔怕寂寞。」

對於有報道指下年1月舉行嘅《2018年度勁歌金曲頒獎典禮》，菊梓喬有機會擊敗容祖兒（Joey）奪最受歡迎女歌星，菊梓喬即刻話：「唔好呀，Joey係我好鍾意好鍾意嘅前輩，佢嘅歌，我全部都識唱，同埋我冇信心，唔會有太大期望，所以每次都懷住乜都冇嘅心情，有就開心，冇又唔會失望。」問到最想攞乜獎？佢就話：「希望增設『最願意單曲循環歌手獎』，因為我經常點擊自己啲歌，我覺得自己啲歌好自癒。」

精選娛聞，喺晒《娛果》
http://fb.com/appledailyent