劉鑾雄(大劉)喺1996年成立嘅同名慈善基金，過去20年基金會已幫助很多有需要嘅家庭，供過唔少學生出國讀書。自從前年底換腎後，佢可以話係死過翻生，對人生有咗好多啟發，近年佢同老婆甘比(陳凱韻）出心出力兼出錢去搞好呢個慈善基金，大劉前前後後都捐咗成40億出嚟。

一向孝順媽咪嘅大劉，自劉老太於15年過身後，大劉即以媽咪劉葉淑婉嘅名義，喺深水埗開設一間「劉葉淑婉紀念自修中心」，主要係幫助窮困學生，目前該中心嘅會員已超過1,000位。日前甘比趁住復活節假期前夕，親身去到自修室，派發佢親自整嘅愛心曲奇同蛋糕俾區內小朋友，希望佢地可以度過一個愉快嘅復活節。甘比嘅一對子女，亦受到父母嘅感染，齊齊參與公益事務，好似之前秀樺亦去過自修中心，教導小朋友做湯丸。

講到大劉成立基金會嘅目的，甘比就話係因為想提供各方面嘅援助：「我哋希望令貧困人士能夠自力更生，可以脫貧，改善生活，深水埗自修中心係我哋第一個試點，我哋希望呢個理念，可以一直擴展開去。努力推進，培育學生發輝潛能，服務社區，關愛社群嘅宗旨。」

身為慈善基金會董事嘅甘比，近年放多咗好多時間去處理慈善基金嘅事務，佢話：「我喺公屋長大，一直希望飲水思源，回饋社會。劉生同我都唔係大富大貴嘅家庭出身，我亦受到劉生嘅薰陶，明白到施比受更為有福嘅道理，所以一直盡力做好慈善工作，除了對單位嘅資助外，劉生睇到報紙有乜嘢人需要幫忙亦會幫手，咁做比較直接，亦因為我哋希望能實實在在咁提供有需要嘅物資或錢於受惠人身上，所以我們寧可自己請社工同職員，唔止捐錢到某啲慈善機構，我哋唔想只是單單捐款，而忽略解決問題。未來會一直繼續劉生嘅理念。」

問甘比幫助個案中，有乜個案令佢好感動？佢話：「好多好多，其中有一個學生喺自修中心老師教導後，成績大有進步，最後更考到第一，入讀大學後，自己又返嚟中心做補習老師，幫補家計，自力更生之餘，又將關愛延續落去，呢點係令我好感動。」

精選娛聞，喺晒《娛果》
http://fb.com/appledailyent