日本藝能界今年旺結婚，仲要係幾個男神，都分別喺最近宣佈脫離鑽石王老五行列，繼伊藤英明、西島秀俊之後，32歲嘅向井理今日亦突然之間宣佈，將於下個月娶大佢3年嘅女星國仲涼子。

其實向井同國仲已經拍咗拖兩年半，一早被人踢爆，兩年前已被發現齊齊行IKEA買傢俬，當時已經有傳佢兩個結婚。

向井同國仲就係前年年初《搖滾大廚》而戲假情真，由假情侶立即變做真情侶，而向井當時又好又搶手，但國仲都成功一直縛住男神。

據日本傳媒話，日本好多女性今個星期都受咗好大打擊，因為向井理喺一啲理想老公選舉中經常排行第一，而第二就係西島秀俊，但二人竟然先後喺今個星期宣佈結婚，令大批女性粉絲夢想幻滅！