當年今日

中環在線 金錢之王陳鎮洪:做風投要狠夠準 - 李華華

蘋果日報 2009/08/17 00:00


好多人對風險投資(VentureCapital,或稱創業投資)都一頭霧水,「金錢之王」之一嘅天泉投資(SpringCapital)總裁陳鎮洪(Vincent)同華華講,其實唔難理解,佢以近廿年嘅經驗話,要成功,首先要夠狠夠準,如果唔覺肚餓,不如提早退休。07年自立門戶創辦天泉嘅Vincent,話內地風投業黃金時代已過,但商機始終無限,佢哋家就鎮守上海,喺再生能源、醫療業、消費業和專業服務業揀心頭好。
Vincent話,全國大約有4200萬間員工少於3000人嘅中小企,當中有10%已賺錢,但好多民企老闆未曾出國,對企業管治冇乜認識,風投基金要入股都幾考功夫,皆因要令對方信任同坐一條船,要聽意見肯改善,否則隨時血本無歸。
創業板先天不足發展難
當然,作為「伯樂」嘅佢亦會諗過度過,首先隻「千里馬」要有爆炸力,過去幾年現金流平衡,一年營業額至少達1000萬美金,天泉喺首輪投資就會投入500萬至800萬美元,一般喺三、五年間有初步收成,屆時再協助呢匹馬進行幾項收購做大做強,或者再搵其他人加入作第二輪投資,適當時候先安排上市套現。
講到風投,不得不提香港苟延殘喘嘅創業板,身兼港交所(388)上市委員會委員嘅Vincent慨嘆,話創業板並非唔得,只係本港先天條件不足,人工租金咁貴,配合唔到創意發展啫。

李華華
mailto:[email protected]