「天荒夜談」、「出神入化」同「耐人尋味」等四字成語，相信唔少香港人都係自細從《老夫子》漫畫身上學到，而呢個陪伴香港人成長嘅集體回憶，今日喺漫畫書走出來，更由胡楓（修哥）及林盛斌（Bob）化身成老夫子及大蕃薯，一齊參與喺屯門舉行嘅記者會，宣佈11月中將會喺天水圍舉行首個以老夫子為題慈善跑。《老夫子》漫畫第二代作者王澤教授話好開心能夠參與咁有意義活動，佢覺得長跑係一份態度，只要做運動多，人也正面同健康，講到香港近年政治令環境氣氛轉差，佢覺得唔好受外間事情干擾，能夠幾千人喺都市中長跑係充滿信心同精力，保持長遠健康心態非常重要。

年屆85歲修哥扮成老夫子為俏為妙，仲喺台上跳跳紥呼籲大家參與，修哥指自己魄力來自保持運動，以往未曾參與過慈善跑，今次更加會身體力行，佢話：「我之前已經開始有跑，因為明年二月會開演唱會，不過我啲人情卡碌晒，我叫主辦嘅何麗全去揾嘉賓，佢哋有提議過四個小生，如果得梗係開心。」Bob指仔女未睇過佢一身大蕃薯造型，但囡囡曾經問過大蕃薯係咪爸爸。