工聯會　王國興
「每個月也有數百名僱員被剋扣強積金，強積金實行五年以來，究竟有多少僱員受影響？又有多少僱員真正受惠？這還未計及許多被僱主強迫轉做自僱人士的人，這些被迫自僱的人並無僱主供款，即使依法供強積金，金額也非常有限。」

職工盟　李卓人
「即使現在有強積金，也沒有任何財富分配的元素，低收入的人根本無法依賴強積金安老。到年老時，那筆錢很快便會用完，又會再陷於貧窮。」

勞工界　李鳳英
「退休保障計劃一個最低限度要求，便是僱員供款的本金不會在退休時受損，但強積金連這個最低限度要求也未必能達到。即使僱員投資最保守的保本基金，在早前經濟不景時，行政費要用本金補貼，未來如果出現通脹，也可能出現本金遭通脹蠶食的情況。」

公務員　陳先生
「我哋行長俸制，退休之後有政府養，每個月都唔使咁愁。強積金就差得遠喇，萬一唔覺意投資蝕咗本，到時老咗都唔知點算？」

地盤工人　蔡先生
「我一個人擔起成頭家，一家幾口都係掹掹緊夠食，啲仔女睇病都唔夠錢。積金為將來？我𠵱家都未搞掂，你同我講將來，嘥氣喇！」

小型貿易公司老闆　王先生
「我哋靠自己創業嘅老闆仔，得嗰三十個員工，樣樣都要精打細算，有咗強積金，咪即係迫我哋做無良僱主，喺啲員工薪水度扣番！」

陸師奶
「強積金？我全職湊仔，有冇保障先？我老公嗰份包唔包括我㗎？咩話？唔包？咁政府即係當我冇到啫，唔通我哋師奶老就唔使生活咩？」

新婚夫婦JohnnyandMarie
「我哋啱啱買咗樓，準備豬年結婚，供樓辛唔辛苦？梗辛苦！份糧已經唔高，仲要畀咁多強積金，還按揭都慢幾年啦！啲官都儍嘅，都係想人儲錢啫，我供樓當儲錢，好過畀錢叫人幫我買啲唔知咩基金啦！」

大學生　黃小姐
「我哋一畢業就孭住大學學費條數，又唔係搵得多，仲要拎去供強積金？有錢都還咗GrantLoan（大學貸款）先啦！」

貨櫃車司機（自僱）　張先生
「以前我喺運輸公司打工，個個月有糧出，𠵱家公司為咗避交強積金，要我哋班司機個個轉做自僱人士，自己養車去接番公司啲單，變相冇咗份工，風險大咗，收入仲少過以前。」

財經專欄作家　孫柏文
「強迫金盲目相信股票同債券喺八十年代至二千年嘅回報率，如果七十年代嘅高通脹同濫發鈔票重臨，香港勞動階級根本冇其他投資渠道去保護自己，例如話唔可以買貴金屬等等，其實好冇保障。」

網民bustergun（香港討論區）
「老闆成日話強積金係福利，我話根本就唔係！佢只不過喺每月份糧度扣數，來來去去，咪又係我哋啲錢！」

網民zllt（香港討論區）
「強積金的表現，似乎不隨大市，市升佢唔升，市跌佢跌得仲勁！實在唔知點解，政府非要所有打工仔供強積金不可。」

網民ydoris（親子王國）
「睇番公積金及強積金，真係複雜到極！究竟我要先處理好這些積金，再額外買儲蓄基金，定係一齊進行？當中牽涉兩個基金經理，又顧問公司，煩死了……」