一代粵劇名伶吳君麗今日黃昏離世，不少圈中人感突然及悲痛，與吳君麗合作無間的胡楓今晚接受《蘋果》電話訪問：「我前日同大前日去醫院探過佢，唔知佢乜事入院，我有問佢認唔認得我，佢有眨吓眼，我諗都係呢幾日，佢屋企人冇講。」胡楓表示人老始終有離開一日，他續說：「最緊要唔好辛苦，我睇佢都冇辛苦。」

至於與吳君麗同代的謝賢，接受《蘋果》電話訪問時：「我唔知呀，因為我哋冇合作過，佢多數係唱歌同粵劇嗰邊，識就梗係識啦，但唔熟，就嚟我都走啦，個個瞓低我哋都覺得可惜，就算我瞓低大家都會覺得可惜，人一定會走，希望佢屋企人節哀順變。」

吳君麗第一套電視劇係處境劇《畢打自己人》，同麗姐合作呢套劇嘅黎耀祥：「吓！好突然，好可惜！佢係一位好nice嘅前輩，當年合作，佢好親切好有禮貌，同導演、工作人員同演員個個都好好溝通，絕對冇恃老賣老。麗姐好謙虛及有修養，經常話自己第一次演電視劇，乜都唔識，叫佢哋多提點佢，真係一個難得嘅前輩。」

吳君麗今年6月曾出席薛家燕娶新抱的喜宴，還預備大利是給新郎哥，家燕姐的女兒石祐珊接受《蘋果》電話訪問表示：「嗰晚細佬結婚，見到君麗姐姐好健康，狀態好好，媽咪話君麗姐姐睇住佢大，所以一定要請佢嚟飲，分享喜悅！所以當我知道佢離世好愕然，媽咪仲想請佢嚟睇演唱會，我哋完全唔知君麗姐姐入院，冇收過佢唔舒服消息，媽咪依家錄影電視節目，佢知道一定好傷心！」

至於馮素波則表示自己睇大戲時經常接見吳君麗，她說：「佢有班朋友成日一齊打牌食飯，早排聽聞佢跌倒，腳痛入咗醫院，不過就唔知佢情況。」