麥明詩(Louisa)同馮盈盈都係香港小姐冠軍，雖然唔同屆，但因為合作拍《後生仔傾吓偈》而成為好朋友。6月10日係盈盈嘅24歲生日，雖然過咗一段時間，但Louisa就好有心買咗份生日禮物畀盈盈，仲喺ig玩直播。盈盈都估到Louisa份人好鬼馬，未見到禮物時已經話﹕「佢開得live，證明份禮物係出得街嘅。」

點知，原來係一件帶有粗口諧音「(數目字)up」嘅Tee恤，成班朋友就笑到咔咔聲，Louisa建議馮盈盈瞓覺時候着，但馮盈盈就話要想喺節目上着，有人就提議佢將件衫調轉，變咗「down no(load)」，馮盈盈更好有急才咁話﹕「其實係line up嘅意思，即係話我啲兵好多，多到要line up喺我後面去攞簽名同影相，thank you(攬住麥明詩)，好感動呀！」

麥明詩除咗送驚喜畀盈盈，連另一位主持人孔德賢生日都有，Louisa同陸浩明即將送吻，未錫前，有人笑Louisa個樣好猥瑣，最後佢真係錫咗落去。孔德賢笑笑口話﹕「嘩，我feel到好濕。」Louisa就自爆啱啱食完雞，有雞油留喺嘴邊。

精選娛聞，喺晒《娛果》 http://fb.com/appledailyent