樂隊Mr.﹑陳偉成（Avis）及Winkie等，今晚喺銅鑼灣出席一個音樂Party。

Avis與尹蓁晞（Yumi）分手後，今年要過LonelyChristmas，佢話：「係呀，一個人，都係好特別聖誕，成世人都係第一次自己過聖誕。」問到點解？佢就話出世時就同媽咪過聖誕，之後15歲開始拍拖，年年都有女朋友喺佢身邊，佢笑言今年要搵返媽咪「合體」過節：「睇下佢有冇啲朋友介紹畀我，」

至於有否傳短訊畀舊愛？佢話：「其實都係朋友嚟，都會講句聖誕快樂，普通朋友都會send，但約食飯睇戲就應該唔會咯，可能有啲人唔方便。」

問到會否再揀圈中人拍拖？Avis表示：「0依家都唔係咁鍾意圈中人，鍾意圈外人多啲，因為媽咪覺得圈中人比較複雜。（有冇對象？）我0依家對象就係我工作。」

Yumi日前喺博自爆「我戀愛了」，問到Avis會否祝福舊愛？Avis就話：「吓？冇恭喜佢，0依家先知，0依家恭喜佢。」

跟住佢仲語帶雙關咁話：「我都知道佢圓潤咗好多，可能佢現任男朋友鍾意，咁更加證明到我間fitness呢個威力好大，更加代表唔做運動嘅人，就會變成咁。尤其係冬天大家唔好食咁多，做多啲運動。」