第3屆大田電視劇節頒獎禮今晚喺大田廣域市舉行，一眾演員包括《沒關係，是愛情啊》男星趙寅成、D.O.和李光洙，以及天后級嘅金喜善、《Doctor異鄉人》女星陳世妍、金釉利等都盛裝赴會，場面墟冚。

雖然噚日氣溫只有8度左右，但眾女星仍然不惜以性感打扮現身紅地毯搶鏡，晒腰、露腿、騷胸樣樣有，當中大姐大金喜善更以一件黑色低胸兼開高衩長裙現身，成功撼贏一眾後輩演員。

至於男星方面，《沒關係》三位男星趙寅成、D.O.及李光洙就最受現場粉絲歡迎，趙寅成全程傍實後輩D.O.，又跟粉絲揮手，展現暖男嘅一面。

而D.O.同李光洙更齊齊憑《沒關係》奪得男新人獎以及人氣Star獎，Ｄ.O.更從《繼承者們》男星崔振赫手上獲獎。而《請回答1994》男星孫浩俊同時贏得男新人獎。另外，已故女星崔真實就獲頒功勞獎，台上頒獎嘅金喜善睇緊大會播放崔真實嘅影片時睇到眼紅紅之餘，崔真實女兒上台領獎時，亦不禁落淚。