A股大落大上，港股亦跟到足，恒指一度大跌近400點，尾市A股跌幅收窄，港股亦由低位反彈，恒指收市僅跌100點，期指仍繼續高水。
大市雖淡，但上升正股超過410隻，二三線股有轉強之勢，似乎已有較多人認為大市跌唔落，開始入番市，若跌唔落嘅心態繼續擴散，大市有機會向上突破。
資本策略（497）和黃金集團（1031）都逆市而升，前者升3.9%，後者升7.8%，而且都有大成交配合，可繼續看好。亨泰（197）高收0.455元，升5.8%，成交更大增到1.16億股，確認升破0.435元的下降軌阻力，可以上移止賺位持有。
中國製藥（1093）近日表現明顯轉強，由低位4元水平回升，噚日最高4.54元，收4.44元，跌2仙，一個大圓底後的「右柄」整固已接近完成，4.68元係圓底頂部阻力，一升破，即可開展大升浪，短線目標5.72元。
中藥08年（12月年結）盈利已大升97%，09年首季獲利2.62億元，再大升72%，保守估計全年賺10.5億元，每股盈利68仙，PE只係6.5倍，好吸引。
旭光資源（067）調整完成，升勢再起，高收3.52元，升0.19元，升幅5.7%，重上10日線（3.365元）同20日線（3.497元）之上，MACD亦將出現「雙牛」入貨訊號，短線上升目標係前高位接近4元水平，整固後可再望空衝刺。

一年目標價4.8元

旭光6月中上市，售價2元，上市後一直有中資大盤密密在收集，高見3.96元後回到3元水平，未有停過收集，現時貨源已歸邊，市場消息話中資大戶已準備做場大騷，揸到年底，會有意想不到嘅收穫。
旭光係礦業股，所開採嘅鈣芒硝，係化工行業同輕工業重要原料，目前旭光3個礦區可採芒硝儲量5720萬噸，兩個礦區年產能160萬噸，為全球第2大生產商，以08年產量計，旭光佔中國市場份額23.2%，亦佔全球份額11.3%。
旭光09年（12月年結）預測盈利不少於5億元人民幣，以全面攤薄計，每股盈利約30港仙，第3個礦場明年第3季可投產，估計每股盈利可達48仙，以高增長股保守的10倍PE計，一年目標價為4.80元。
郭兆誠