由韓劇《我係金三珣》女星金宣兒夥拍甘宇成主演嘅SBS新劇《能先接吻嗎》，噚晚播出第21、22集，港劇迷可於Viu同步追看。

劇情承接上集，甘宇成與金宣兒結婚後度蜜月，點知甘宇成突然暈倒被送院，金宣兒立即趕到醫院搵對方。而旅行後，金宣兒、甘宇成齊齊返屋企，卻發現金宣兒所有嘅物品都唔見晒，原來係畀甘宇成個女鄭多彬掉晒。甘宇成打電話向鄭多彬坦言：「我明白你咁做嘅理由，亦知道你好嬲，但咁做亦唔會改變到啲咩。」但其實鄭多彬只係想要多啲父愛，想甘宇成了解佢。

金宣兒前夫吳智昊得知甘宇成有病仍與金宣兒結婚而大感生氣，相約甘宇成喺咖啡店見面，鬧爆甘宇成嘅做法好自私，並質問對方點解仍要同金宣兒結婚，甘宇成表示以為金宣兒唔愛自己，而自己又好愛金宣兒，所以想臨死時將所有金宣兒想做、想要嘅嘢畀晒佢。不過吳智昊卻指：「佢愛你，佢話唔想放棄，想再好好生活一次。」令甘宇成覺悟佢咁做會害死金宣兒。

鏡頭一轉，金宣兒幫甘宇成執嘢時發現甘宇成嘅藥樽，諗起兩人喺酒店大堂相睇當日，甘宇成亦係食呢種藥，得知對方患病嘅事。最終甘宇成向金宣兒坦白：「我要死喇，對唔住。」。結尾甘宇成憶起八年前與金宣兒嘅第三次見面，當時正落住大雨，金宣兒拜託甘宇成出庭做證，但甘宇成望住狼狽嘅金宣兒卻冇伸出援手。

而《能先接吻嗎》噚晚兩集收視微跌至9.4%及11.5%，但仍穩居同時段收視冠軍。至於KBS就播出新劇《我們遇見的奇蹟》特輯，有3.5%收視率排第二名，MBC嘅《偉大的誘惑者》噚晚播出嘅第9、10集，則以2.2%及2.5%收視率包尾墊底。

更多韓流，喺晒《娛果》
http://fb.com/appledailyent