【賭馬講呢啲】何澤堯有正氣光環！周末吼實佢兩匹座騎（妙瞳）
蘋果日報 2020/01/09 21:20
妙瞳賭馬講呢啲友誼至好好鬥心
何澤堯予人感覺較為正氣
昨晚（8日）谷草九場，分別有三匹馬獨贏25蚊不夠，結果頭場22蚊「特駒聯盟」跑第二已經最叻，其餘2.2倍「魅力漢子」及尾場回飛都係僅僅得廿蚊的「晨曦飛馬」，可以跑到無P！
其中後駒在潘頓手上，最後一百可以出奇地甩韁繩，賽後報告就輕輕帶過，建議大家有時間不妨看看馬會巡邏影片，記緊要聽中文評述員點評！
季初提過潘頓騎一面倒大熱門不時死火，不過睇番今季騎師大熱門表現統計，截至上次賽事，潘頓騎大熱門上名率六成半，比死敵雷神高之餘，還要與上季奪冠時交出的成績66%近乎一樣。
換句話說，潘頓只不過是騎像「晨曦飛馬」這類近乎無可挑剔的大熱門時特別論盡，點解呢？
單睇數字，今季何澤堯大熱上名率61%不及潘頓，但賭前者熱門，總覺有正氣光環，較賭潘頓較少顧慮。
回說何澤堯剛戰起孖兼捧盃，周末（11日）則有第八場三班1650米泥地「好鬥心」這匹實力馬，可續添進帳。
該駒前仗配何澤堯跑泥地一哩掟大彎追唔切跑第二，上仗再跑同程排好位兼用雷神，可惜騎者當日感冒缺勤配楊明綸，沿途走內叠反而唔衝。
今次何澤堯重掌帥印，已有充份資料掌握「好鬥心」走位特性，可望拚出頭來。
至於尾場二班1600米草地「友誼至好」近三仗改配何澤堯非冠即亞，上次僅不敵四歲馬風頭躉「幸福笑容」，今次對手轉弱，人馬可再夾檔贏馬。