韓國天團BIGBANG嘅隊長G-DRAGON(GD)出道咁多年，雖然有參與綜藝節目同埋短劇嘅演出，但佢就從未拍過劇集同埋電影。

不過近日粉絲就發現GD竟然拍劇，但又從未聽過佢會演劇集嘅消息，加上之前佢一直忙於做BIGBANG演唱會，近日又要為十周年做準備，照計GD應該係冇時間拍劇，但唔少觀眾都話見到GD有份出演SBS嘅周末劇《美女孔心》，但奇就奇在GD竟然反串演出做女主角，同男主角南宮民上演愛情戲碼，真係攨爆頭。

睇真啲原來所謂女主角係女團Girl'sDay嘅敏雅，事關敏雅嘅樣貌一直同被指同GD似足九成，特別係當敏雅冇乜化眼妝時，真係神似GD，而近日敏雅拍《美女孔心》時又戴上個冬菇頭嘅假髮，所以唔少觀眾睇到啲截圖時，真係以為係GD秘密去咗拍劇，真係弄出唔少笑話。而唔少網民都話初頭睇到啲劇照真係以為GD走咗去拍劇，認真笑爆咀。