近年手機玩大芒，其實咸豐年前都有摺機鬥細的年代，上年Kickstarter就有個眾籌計劃話要挑戰細之極限，推出體積僅46.7 x 21 x 12mm，重13克的超迷你手機Zanco Tiny T1。近日這部可能是世上最細的手機即將在香港發售，Gadget Guy就搶先拿到了實機測試。一打開盒真係當堂嚇一跳，因為部機細到只有兩節手指頭大細，只比5元硬幣稍大一點。

看上去像模型道具，但真的能插SIM卡使用，運行GSM 2G網絡，可以通話和傳送SMS短訊。部機一隻手指公都遮晒，用來打字send短訊或者按鍵做各種設定很有難度。不過實試通話效果又有驚喜，放在耳邊已能做出清晰對話，收音咪高峰的表現不錯。作為一個2G手機，功能不多，可以接駁藍牙耳機，另外有一個變聲工具magic voice，其中有一個特效變聲，極似新聞節目聲音經過特別處理的效果音。手機以USB線充電，待機時間可達3日，通話小時為3小時。

其實點解要出一部咁細嘅手機呢？上年年底公佈後，就有外國媒體指呢部手機好受監獄犯人注意，因為部機極細，兼且塑膠零件較多，放喺人體一啲隱蔽位置有機會避過金屬檢查裝置偷運入獄。不過以上都是小道消息，創作團隊就話just for fun，同埋適合收埋喺任何口袋方便攜帶。香港有舖賣$398，老實說，應該冇乜人會覺得實用，但呢個價錢買部趣怪盞鬼迷你手機做後備機，純粹過癮都可以接受。

Facebook專頁：thebackerstores

記者：司徒港燊
攝影：蕭志南

全新旅遊專頁，即like籽想旅行： https://fb.com/travel.appleseed