區選建制大敗，相信衝擊唔少大陸人、甚至係克警嘅思維，「原來『支持香港警察嚴正執法』唔係沉默大多數心聲嚟架？！」唔好玩啦，睇黨報，從來只會睇壞腦，以下呢單極瘋狂嘅騙局，又係一個例子。

話說今年5月，大陸有種革命性嘅技術正式誕生，有個偉大嘅發明家，成功發明一種催化劑，只要加少少，就可以令水，「炸」一聲變成氫氣，然後成為能源推動車嘅引擎。係咪唔明呢，簡單講，浙江青年汽車嘅老細龐青年，佢發明咗一架車，倒水入去，唔使入油唔使叉電，叮一聲，行得！

WOW！一聽，就知又到偉大中國亮劍嘅好時機，據當地黨報《南陽日報》報道，南陽市委書記現場視察完，即刻直豎拇指，講晒雞腸「It's very good」以示稱讚！

結果係點？唔好玩啦，青年汽車10月底時產已破。呢咁侮辱人智商嘅騙局，搞到半年已經係奇案，但最奇情嘅係，據法庭文件，佢竟然呃咗50億人仔先破產！

再講返佢個人背景，其實佢自2010年已經開始喺唔同省份，好似寧夏、鄂爾多斯、浙江海寧、江蘇連雲港、貴州六盤水搵食，主要都係吹到個project大一大，然後呃投資、呃補貼，本身已負債纍纍，但單係2017年，都畀佢拎到1.18億元汽車補貼！即係話，佢玩咗唔同騙局達八年之多，今次再故技重施，仲要大家都明知佢係騙徒，但都仲畀佢呃到50億？到底科水嗰個，個腦係咪裝屎？定係已化成氫氣？

大家要明白，大陸唔少人有個信念：「黨就是對的！」跟住黨嘅思路，就一定冇得輸，一來南陽市委書記都畀Like、二來2017年《人民網》都報道過，黨報中嘅黨報，大字標題《青年汽車首輛水氫燃料汽車亮相　續航里程500公里》，更重要係光大金控，國企都係青年汽車投資者。

結果再一次證明，「理得佢之前係騙徒，有國家支持就係有錢途」，呢種過份迷信黨媒風向，不停猜度習主子的心思，以為自己好醒，結果失去理性分析，判斷錯誤，輸錢收場。而佢哋可能冇諗過，到底黨媒嘅報道，有幾多成係真相，又有幾多成係私心。

講到香港，有日，政圈有個朋友叫我估，「你知唔知點解黑警報嘅遊行人數，都係用『毅進制』，同現實數字遠到離晒譜？」我話，「因為條數唔係畀我哋睇，係畀阿爺睇」「冇錯！」

一國兩制今日嘅徹底失敗，其中原因，相信同地方小官，隱瞞民意、欺上瞞下多少有關。雖然我唔知，中央錯估民情同黨媒假新聞有幾大關連，但我只知道，信黨媒嘅人證明咗一件事：「人一藍腦便殘」是真的。

by千頌C@堆填區
http://fb.com/winbigwok