當年今日

胭脂紅質素勝往年

蘋果日報 2002/08/07 00:00


我肥師奶認為胭脂紅係眾多番石榴之中最好食嘅一種,佢係我哋祖國特產,價廉但就相當香甜,從遠處都可聞到佢陣陣嘅清香味,不禁令人口水流呢。
胭脂紅色澤黃中帶粉紅,所以就有呢個稱號,家陣貨源足,到處都幾乎搵到佢嘅蹤影,而且今年嘅胭脂紅質素更勝往年,食味更加更清香,趁當造買磅返去試,糖尿病患者都啱食。
鯊魚皮膠質豐富
急凍鯊魚軟骨有時喺大型超市嘅冰櫃可以搵到,唔算太出奇,但我肥師奶最近行超市時見到竟然有鮮鯊魚皮賣!
聽講鯊魚皮係鯊魚免除各種癌症疾病的保護罩,而且含有豐富嘅膠質,對身體都頗有益。
一包包鮮鯊魚皮味道頗腥,要先用薑出水先至可以用嚟煮。鯊魚皮可以用嚟煲湯,又或者加入香濃嘅醬料嚟燜,咬落爽爽滑滑,有啲似海參嘅質感。
文:肥師奶