立法會噚日開始恢復《國歌法》二讀辯論，不過未開始傾，警察就將成個金鐘重重包圍。咁包圍到咩境況？就係當立會入面會都開完、夜闌人靜時候，大家都要歸家嘅時候，有路都走唔到，結果莫講話傳媒、議員助理，就連立法會嘅秘書都一齊上演出埃及記。

靠「摩西」轉達先獲放行

立法會以抗疫為由，每晚準時8點閂門。噚晚八方喺踏正8點，見證立法會保安關上大閘後，冇諗過會變成身處金鐘內嘅巨大監獄！八方原本嘗試按一貫離開立會大樓路線，循政總外嘅夏慤道天橋離開，不過嗰度早就有警察侍候。

此路不通，咪第二條咯。咁行去海皮沿海濱走又得唔得？結果又係唔得！咁經立法會嘅樓梯上返去中信天橋走呢？No way！行分域碼頭街往會展方向走？你就想！原來又封埋！唯一嘅出路，就係沿夏慤道行到去灣仔演藝再離開。

正當八方同其他傳媒行家、議助無助之際，一位立法會秘書猶如摩西般出現。當然佢都冇辦法左右到皇軍般嘅popo放行，但至少佢可以透過立法會保安再聯絡警察，開番夏慤道天橋嘅閘，等大家可以兜番去中信天橋去金鐘站。話說回來，《國歌法》相信要下星期先表決，換言之呢幕出埃及記可能仲要上演多幾次先夠。

李八方