俗語都有話：識睇就睇留言！

想知邊齣劇好睇就梗係睇留言啦，上月由韓國女神全智賢同李敏鎬主演嘅新劇《藍海傳說》開播，由於係全智賢產後復出新作，全城期待，不過劇集雷聲大細點小，除咗開播收視贏《太陽的後裔》外，0依家播到第六集收視都未衝破20%，加上唔少網民都話劇集同《來自星星的你》嘅劇種好似，欠缺驚喜，而且全智賢角色設定同《星星》「千頌伊」大癲大肺又好似，覺得都係翻炒《星星》橋。

反而上周五首播、逢周五及周六晚由孔劉、金高恩、李棟旭同劉仁娜主演嘅《鬼怪》，播出兩集已受到劇迷追捧，除了贏收視外，又贏盡口碑，無論韓國、大陸定香港劇迷都用自己嘅方法煲劇，香港劇迷就可以喺Viu上追看，大陸嘅劇迷估計佢哋就上其他網站欣賞，事關劇集題材圍繞「鬼神」，加上「限韓令」關係，估計大陸都唔會有合法途徑追劇。不過劇迷都用自己方法煲劇，除咗韓國網民大讚《鬼怪》外，本港劇迷同大陸劇迷都一致唱好劇集，大讚劇情緊湊，兩位男主角及女主角都表現好出色，有大陸網民仲直言《鬼怪》好睇過《藍海》，香港劇迷就覺得《藍海》雷聲大，但結果卻不似預期，同時港劇迷都大讚《鬼怪》好睇，好有電影感，雖然只播出兩集，但已令佢哋好心急每星期五同六嘅來臨，好想繼續追看下去。