狄易達苦練舞藝，教出唔少好學生，不過佢前日就有啲冤屈咁喺facebook寫咗篇文，內容大致係話好多人將「機會論」掛喺嘴邊，好似之前有個大商場嘅PR當面邀請佢間學校嘅小朋友做表演，同樣講咗大堆「機會論」，最好笑當佢問對方：「預算大約有多少？」時，對方竟然反問佢：「即係邀請你哋嚟表演，我哋要畀番錢你？」即刻令達仔好疑惑，想知佢哋去嗰個商場食嘢係咪唔使畀錢。

臨時多要求

貼文一出，網民一面倒撐達仔，有人比達仔更激動，爆粗之餘，仲分享自己遇過差唔多遭遇嘅事。馮仁昭噚日打過電話畀達仔，佢話：「其實呢種情況唔係呢幾日發生，之前已經有，呢行好多人都遇過呢啲問題，有時公關說話唔好聽，自己試過幾次。有朋友搵你做表演，好似炫耀畀份工你做，不停喺度講，做嘢時又好多無理要求，好似邀請出席活動，去到臨時又要你唱歌跳舞。」
不過，達仔都講番句公道話，話呢行唔係全部都係衰人：「其實好多好好，好似《100毛》，上次《毛記台慶》，我雖然唔係表演，但幫佢哋排舞好開心，對我嚟講佢哋係客人，明白佢哋有要求同有製作費限制，但佢哋好坦白真誠溝通，大家都係想表演好，所以好睇溝通。」
撰文：馮仁昭