波蘭方面,首戰對厄瓜多爾負0:2,抵輸!呢班波完全表現唔出水準,不過睇佢哋整體球員質素,即使表現得出水準,戰力亦有限。波蘭戰術上亦無哥斯達黎加咁細膩,呢場波計正路應該畀德國剋住。
寫呢段稿之前,華度啱啱喺萊比錫返到法蘭克福,途中要喺Fudal呢個德國小市鎮轉車。見仲有時間,就喺火車站周圍行下;見到間網吧,但入面得嗰幾部電腦,上網地方佔舖位唔到三分一地方,原來內有乾坤。呢間嘢有個莊家做緊世界盃波盤,算係當地外圍佬;外圍佬知道華度來意,又見係亞洲人,搭晒膊頭開晒佢嘅分組賽歐洲盤出嚟。
呢啲賠率使鬼喺度睇咩,梗係問下佢德國對波蘭有冇料到啦。意料之內,德國人都係捧番德國隊,但外圍佬話咪咁樂觀,佢估最多贏1球,華度都係咁話!
文:華度
華度心水:讓球主客和:德國和[-1]