花旗股市繼續升，㗎仔股市喺支持位彈返上嚟，港股好友梗係唔客氣，恒指一挾就是416點，喺咪只係挾倉效應？睇現貨成交有成643億，就知道唔係玩挾倉咁簡單，或者起碼唔只挾1日。
昨日上升正股有500隻，唔算係盛況，個市如果百花齊放，應該會有700至900隻正股上升，不過，大隻股份就生猛番，咁即係話港股仲會不斷有新兵源可以接力推個市上去，如果成交保持喺600億以上，21000關應該唔會係好難突破嘅關口。
只要大家對個市嘅睇法唔係好淡，呢啲市況要搵股票炒唔係好難，穩陣嘅就揸滙控（005）呢類大藍籌，搏啲嘅就揸當炒股份，𠵱家國企股仍然係最殺食，保險股愈升愈有，仲未到戲肉，銅鐵股想郁，雖然唔係隻隻有輪炒，但係升起上嚟都幾吸引。國內銀行股趁住中信銀行（998）招股蠢蠢欲動，早幾日介紹嘅招行C輪4828話咁快就升到3.23元，正股仲有得去，唔使咁快沽，推高個計數位就得嘞。國企股炒起上嚟會好癲，昨日隻中交C輪3620雖然升咗34%，但正股啱啱破位，向上嘅空間好大，有貨揸住就得。國壽（2628）昨日升1.5%，業績快揭盅，係飆車嘅時候嘞。

中財險C輪9827：中財險（2328）昨收5.29元，公布業績前都有好多捧場客，保險股係當炒sector，公布完業績後，中財險都會同其他保險股一齊炒上，可以諗吓中財險C輪9827，昨收1.96元，槓桿率2.7倍（有效2.6倍），對沖值0.96，正股升上5.80元，9827應該升到2.50元，正股升上6.20元，隻輪應該喺2.82元樓上，呢個價買番啲，正股跌穿5元止蝕。