上周五恒指收16267，同6月中最低15204比較，回升過千點。同5月初5年半新高17328比較，則又低過千點。美國息魔陰影，暫時消失，估計大市反覆向好。但過去兩日彈得急啲，即時高追C輪可能會先蝕底，吼回吐嗰陣先至入市。P輪，咪搞住。
滙控C輪4956：恒指成份股改比重，滙控（005）佔份量最終由30%降至15%，首階段下月降至25%，指數基金將要減磅。唔使緊張，咪以為滙控會大散。吼位買滙控C輪。
可以諗吓4956，9月尾到期，輪價45仙，溢價2.4%，槓桿率30.2倍（有效18.9倍），引伸波幅13.8%。

恒指C輪3659：恒指上周重上萬六點，短期要回落至萬六點以下，機會好微，但唔排除回吐一二百點，吼位買C輪，可以諗隻3659。
3659喺10月下旬夠鐘，輪價20.4仙，溢價4.2%，槓桿率21.6倍（有效12.1倍），引伸波幅18.1%。
中信C輪3525：中信泰富（267）有追落後條件，可以睇位買C輪。
中信C輪冇幾多揀，始終係3525略較活躍，數據亦較靚。隻輪下月初夠鐘，輪價12.6仙，溢價1%，槓桿率18.2倍（有效14.7倍），引伸波幅18%。另外4隻C輪，難買賣。
章盛