馬丁話呢次係從政以來處男下海,噚日陽光普照,波平如鏡,若非有工作在身,八方都想曬太陽游水,馬丁同楊森等人着住短褲,企喺近岸淺水位置,拉開「楊森連任」橫額,正當佢哋齊齊振臂高呼「全力以赴」口號之際,遠處有個泳客都舉高手,八方以為佢係白鴿黨fans,點知佢無故下沉,睇落有啲唔對路。
楊森等人掛住拉票,繼續開咪大嗌「楊森連任」、「楊森連任」,唔知身後發生乜事,呢個時候,嗰個泳客又忽然蒲頭,仲大嗌「救命呀」、「救命呀」,原來有個女泳客遇溺!選舉期間嗌告急係閒事,馬丁、楊森係政壇老將,可能對呢啲呼叫聽到麻木晒,一時間冇乜反應,遇溺者嗌多兩聲,救生員都跳晒落水,佢哋終於知道呢次唔係假告急,而係真遇溺。
白鴿黨水浸眼眉自身難保,所以幾個人都冇撲出去救人,只係企定定做塘邊鶴,可能情況真係太緊急,佢哋睇睇吓都情不自禁一齊幫手嗌救命,一時間都唔知佢哋係為選情呼救,定係幫個女遇溺者求救,說時遲那時快,救生員唔使一分鐘就將個遇溺者救返上岸,呢個時候,馬丁大讚救生員好嘢,齊齊拍手歡呼。
女泳客獲救後冇大礙,至於楊森,就唔知有冇咁好彩嘞。佢噚日指白鴿黨喺港島都有十幾個樁腳,連任雖然唔容易,但都唔係冇可能,加埋馬丁伸出援手,所以有信心當選;馬丁亦睇好楊森,笑言楊森都冇嗌救命,暫時好安全。佢哋噚日只喺岸邊活動,上水後上半身滴水不沾,仲穩陣過㩒地游水,難怪唔使嗌告急住啦。
唔出選港島嘅單仲偕有得上京睇奧運,馬丁冇份,上星期奧運開幕禮時喺台灣睇電視,佢話開幕儀式時去咗食飯,返到酒店時錯過前半部份精采節目,睇住多個國家運動員入場悶到瞓覺,李寧吊威吔點聖火都幾犀利,做品牌生招牌,馬丁話幾辛苦都值得。中國隊頻頻奪金,馬丁建議奧運考慮加入新項目打麻雀,一來發揚國粹,二來肯定係中國人天下,佢又透露黨內雀王係單仲偕,李華明則係「魚腩部隊」,所以人緣甚好。
mailto:
[email protected]