皇家馬德里今季自從請咗賓尼迪斯之後，爭議不絕，傳出球員對佢不滿，甚至連球迷都喝倒采，而主場入座率更跌到近年新低，如果討好唔到呢班米飯班主，就算有主席佩雷斯撐腰，賓帥都命不久矣。

吞巴塞四蛋後入座率插水

求大俠都有睇開西甲直播，以往皇馬主場巴拿比奴球場總係坐滿球迷，白海一片，上季平均入座率89.9%，係西甲之冠，但近期入座率每下愈況。西班牙《阿斯報》就作出統計，8月30日主場開鑼戰對貝迪斯，有七萬人入場，11月21日主場對巴塞隆拿嘅國家打吡，就梗係一票難求，84,000個座位全場爆滿，不過輸咗0:4之後，球迷噓聲四起，對賓帥領軍嘅銀河艦隊都死晒心。
前一場西甲主場對基達菲，假假地都叫首都打吡，但跌到得番64,000幾人入座，上仗對另一支馬德里球隊華歷簡奴，更加得番61,000幾人入座，入座率只得72%，如果穿埋六萬呢個心理關口，皇馬都幾大鑊；唔知係唔係要𠱁番球迷，呢場波皇馬都出盡力數對方10:2，希望可以挽救球迷嘅心啦。

買星造新聞雙管齊下？

咁講真，皇馬今季又冇買超級巨星，新人高華錫星味唔夠，又係睇BBC組合，球迷都嫌悶；佩雷斯都識驚，話明年一月轉會市場重開希望引入一、兩位球星增加叫座力，包括拜仁慕尼黑前鋒羅拔利雲度夫斯基、多蒙特翼鋒馬高列奧斯等。不過遠水不能救近火，球隊都要搞吓新聞吸引球迷注意，好似近期傳出「HEHE」嘅C朗，就打破「基」的疑雲：葡萄牙《新人物》雜誌爆料，話佢成日飛去摩洛哥，唔係密會「拳擊男友」，而係同撻着冇耐嘅葡法混血兒女友美拉莉（Melanie Martins）見面；美拉莉咁索，如果好似以前艾琳娜咁成日去巴拿比奴捧場，就可以吸引更多男球迷入場啦。