民建聯遮遮掩掩喺商台賣政治廣告，五區公投光明正大做政治宣傳，炮製《十八仝人撐公投》短片，搵咗18個人上鏡呼籲大家5.16投票，短片最快下星期上網，今日畀啲拍攝花絮大家先睹為快。

18仝人包括公、社兩黨五個候選人，仲有兩黨高層余若薇、陳家洛、陶君行；梁家傑太太陳淑儀、民主黨馬丁都有份。另外仲有多個名嘴，包括商台DJ朱薰、前DJ慢咇、茜莉妹、林超榮、梁文道、周博賢同邵家臻，近期紅到爆嘅「維園阿哥」任亮憲（網名馬草泥）更加唔少得。呢齣催票短片由導演鄭啟明同編劇葉文希創作，兩人前作係「葉國X撐公投之點解我要投票」，網上反應不俗，希望再下一城。18個人都係大忙人，所以拍攝時間十分緊張，視馬丁為偶像嘅馬草泥，見到馬丁時好似fans見偶像咁拘謹，點知馬丁話佢都係馬草泥fans，馬草泥受寵若驚。
編、導兩人可能太年輕，冇做足功課，對白時話馬丁60幾歲，馬丁睇到劇本時心花怒放，「點止呀！我七十有二啦！」文化人梁文道好有heart，拍攝前唔單止睇自己讀嗰幾句對白，仲要睇埋其他人嗰啲，成份劇本睇晒，知道前文後理先roll機。

政治廣告《十八仝人愛落區》反應唔多好，顯示民建聯軟銷都唔多掂，網上電台「青台」主持人林子健噚晚爆料，指民建聯早前曾接觸「青台」，表示願意畀錢加入做主持，反映民建聯想進佔輿論陣地好積極，後來卻冇下文，原來係搵咗商台做交易。
商台「引入魔鬼」被聽眾指愧對已故嘅林彬，有人甚至搞公祭，八方聽聞商台部份人對此不以為然，尤其係幾十年老員工，因為佢哋曾經與林彬共事，覺得唔應該打擾過身幾十年嘅人，但最煩嘅係「見錢開眼」嘅sales同事，事關贊助節目是否廣告呢個灰色地帶被擺咗上枱，廣管局揸正嚟做嘅話，生意都幾難做。
mailto:[email protected]