今日有報道話黑社會勝和元老「雞腳黑」（全名招國強），前晚喺尖東帝苑酒店擺壽宴，筵開20幾圍，好多江湖朋友到賀，而警方亦都派咗多名反黑組探員到場監視。期間艾威同吳國敬都有去壽宴，吳國敬重同啲江湖人物林江及薯仔握手傾偈㖭。

《蘋果》今日問番艾威，佢話：「我當晚係去做表演嘉賓，入場之前啲差人都有同我打招呼，佢哋都問我係咪嚟做表演嘉賓。」問佢出席呢啲江湖場合驚唔驚，佢話：「又冇乜驚唔驚喎，人哋生日唱支歌畀人聽，開心嘢嚟，又唔係叫你講數又唔係叫你開片，artist都應該冇乜分表演場合嘅。嗰晚係其中一個大佬叫我去嘅，我同呢個大佬朋友都有少少緣份，幾年前我啱啱開《無間道》（網劇），啱啱識得佢，佢都有投資娛樂事業，開電影開演唱會，我就問佢介唔介意我新戲角色用你嚟做參考呀，我發覺佢一舉手一投足都好有戲味，佢話唔介意，於是乎同佢接觸多咗囉。我《無間道》個角色就參照佢做藍本。」

艾威話之後個大佬搞好多演唱會，都有叫佢做嘉賓：「吳國敬都係其中一個啦，吳國敬都有好多演唱會係佢出錢出力去搞。阿敬嗰晚都係去做嘉賓。」問到艾威呢位大佬係邊位時？佢話係「沙田me」（全名翟浩琛）。而「沙田me」前年就傳過同林雅詩發展到同居階段，其後林雅詩出席「弘武電影制作發佈會」簽約儀式時，就強調自己單身。 （新聞連結： https://bit.ly/2JTbNMt）

《蘋果》打畀吳國敬，佢話：「呢啲係俾面派對，唱首歌賀人哋生日啫，出嚟娛樂圈打滾咁多年，一定有啲江湖朋友嘅。」講到係咪有江湖朋友投資佢開演唱會，吳國敬話：「乜人都有投資，有人請咪唱囉，有飯食，有工就開㗎啦。」

精選娛聞，喺晒《娛果》
http://fb.com/appledailyent