改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》（江南美人）近期喺韓國熱播，劇集噚日播出第12集，收視再創5.4%新高，港劇迷可於Viu同步追劇。

劇情講到林秀香為咗變靚而整容，仲同以前同學仔車銀優重遇，承接上集銀優拉住林秀香嘅手問：「你有冇有啲鍾意我？」點知林秀香唔認鍾意銀優，仲死撐銀優有所誤會，又強調二人只係朋友，銀優問佢係唔係有鍾意嘅人，林秀香就話冇。

由於被林秀香拒絕，銀優生悶氣，仲走去染頭髮，喺學校二人相遇，林秀香讚佢頭髮染得好睇，銀優就晦氣話：「唔係為咗好睇先染。」

銀優媽媽約林秀香食飯，順便問佢銀優點解染髮，林秀香一面苦惱，仲同銀優媽咪講有個靚仔鍾意自己，銀優媽咪就勸林秀香：「雙方心意才重要，希望你唔好後悔。」

喺大雨中，林秀香目睹趙宇麗主動抱實銀優，林秀香即時飛奔跑走，銀優見狀趕緊追住林秀香，又問佢點解唔聽電話，同時強調自己對趙宇麗冇任何意思，林秀香扯開話題，銀優即激動話：「唔好扯開話題，你真係唔知道嗎？我鍾意你，我哋拍拖吧，唔好逃避！」林秀香婉拒佢好意，又話：「我和你拍拖大家都會講閒話。」雖然銀優話人哋點講冇關係，但林秀香仍堅持話自己對銀優來說沒可能。

而學長郭東延亦向林秀香表白，郭東延話鍾意林秀香因為佢漂亮，亦都係佢嘅理想型，林秀香話自己整咗容先變靚，郭東延體貼話：「對我來講你只係你。」不過林秀香都係拒絕郭東延好意，郭東延知佢心有所屬，即溫柔拍佢膊頭話：「沒關係，祝你同銀優好運。」而呢幕就被銀優目睹。

精選韓流，喺晒《娛果》
http://fb.com/appledailyent