今晚ViuTV嘅《帶住矛盾去旅行》，終於曾主席同長毛梁國雄都有少少火花，由於波蘭曾經俾共產黨統治，兩人今集去到唔少共產時代嘅歷史遺址，好似共產博物館，共產食堂。

當中有位波蘭大學主修東方系，識講普通話嘅女學生主動提出，向兩位發問香港人嘅身份認同問題。曾鈺成堅持「一國兩制」係對香港係最好嘅做法，長毛強調香港需要民族自治，亦想中國人可以自己選出領導，將來一定要行「聯邦制」。

而「香港人」嘅身份，曾主席強調「香港嘅中國人」，同其他地方嘅中國人唔同，長毛就話，中國經常都問人「係咩人」，咁樣令人好討厭，兩人又再以「爺孫」嚟形容香港同中國嘅關係，曾主席話:「這個孫子經常跑出去，經常不認你，對這個祖父不滿意嘛。」長毛話:「那這個祖父不能保護這個孫子。」

至於講到波蘭人對波共長久的反抗搞工人運動嘅歷史，長毛直言現時香港同當時波蘭都有相似之處，當導遊話當時政府對於人民嘅回應都係三幅被時，長毛乘機寸爆話:「我喺香港立法會開會時，班局長都係講一樣嘅嘢。」

曾主席強調將波蘭同香港比較冇咩意思，不過長毛就話:「大家都係有個專制嘅政權唔俾你有民主，就好相似。」仲話中共比波共更差。

終於到咗波蘭一夜，兩人落bar飲酒大講女人經，長毛話:「自以為靚嗰啲(女人)其實最醜陋，人大方就靚架啦。」曾主席問佢曾經有幾多個女朋友，長毛又拉開話題話:「我每一個女朋友我都覺得佢哋好可愛嘅，個問題佢覺得我唔可愛囉。人係咁O架啦，你愛得不得其法咪收唔到你嘅愛囉。」

再問O依家香港「搞成咁」，點算好?長毛竟然叫唔好錄影，佢話:「香港人係未ready好，你要改變個社會，未ready，冇犧牲之心。因為改變係要犧牲，包括我在內，如果我哋犧牲，成就唔係o依家，係將來。而家好多人都話長毛係out喇，冇問題，out咪out囉。我希望有能者居之，我哋始終有一次，我哋坐喺度咁多人，冇人鍾意死人，但係有時可能話似musicchair，輪到你，就冇計。」曾主席面色一直沉，仲話:「我諗到我做特首啦，我點知。」