【廣告經綸】疫市散貨出奇招（文迪晞）
蘋果日報 2020/03/12 15:00
文迪晞武漢肺炎
文迪晞：可以將一些實體店交易放上網，大推online精選散貨場
有些交易，除了用錢，仲可以以物易物。以前聽過在一些收入水平較低的社區，有些義工團體或NGO會搞一些藝墟及以物易物地攤之類，不用任何金錢交易，只要互相交換一些家裏多出來的東西，甚至乎一些個人專長的服務。例如，你幫隔籬屋陳太個仔補習，佢就幫你剪頭髮或煮飯作為交換。
近排疫情嚴重，人人都唔去銀行，只去行山；唔去商場，只去超級市場；唔去戲院，只睇Netflix煲《愛的迫降》⋯⋯好多品牌跟顧客之間的接觸減少，關係變得疏離，生意大受影響。故此，當中有好多與營銷有關的員工都變得有點兒投閒置散，又怕被迫放無薪假，更怕被裁員。
可以點？其實，大可以將一些實體店的交易放上網，一於大推online精選散貨場。同時，廣告公司可以集合他們不同客戶的產品及服務，以員工優惠價，放上這個交易平台出售或交換。試想想，這個網上交易平台可以有特低門檻、毋須驗身及現身的保險產品、比外間更優惠的年金產品、折完再折除菌洗衣乾衣機、超長2020年內有效來回歐洲機票、半價海洋公園門票、以優惠價預先book定今個聖誕嘅五星級酒店雙人套房及自助餐等等。一方面可以刺激消費、益吓各公司自己的員工，同時又可以各取所需，畀錢買又得，以物易物又得，有錢冇錢，有心情冇心情，一舉多得。