送蛇迎馬，八方搵嚟有逾120年歷史嘅廣東真步堂第三代傳人蔡伯勵，分析12生肖甲午馬年運程。蔡大師話12生肖馬年整體運勢不俗，最佳依次係羊、虎同馬；最差則係鼠，其次係牛。咦，出生於1954年嘅狼振英屬馬㗎喎，唔通民望今年會反彈？而出生於1961年嘅港視主席王維基屬牛，運勢比較差，唔通狼英喺佢嘅當旺馬年仲有陰招打壓魔童？
蔡大師話呀，屬馬嘅狼英凶星為太歲，吉星將軍，馬年運程唔差，「來年係屬馬嘅本命年，冇犯太歲，又有吉星將軍幫忙，將星護駕，建樹不凡」，唔使講都知將星最有可能係阿爺。但蔡大師似乎有啲了解狼英份人，提示對方凡事都係低調啲好，「言論唔好過激煽動到人」。

茂波福澤興隆 葉劉祿勳進爵

而運程最好係肖羊，有吉星太陽，「太陽正照，福澤興隆」，出生於1955年嘅發展局局長陳茂波就係屬羊。查實佢嘅醜聞爆得七七八八，否極泰來，相信今年好過上年。肖虎者運程排第二，蔡大師話喺吉星影響下，儘管有凶星白虎，仍能「祿勳進爵，借虎添威」。出生於1950年嘅葉劉淑儀就肖虎，話佢「祿勳進爵」，莫非可以升呢取代林煥光做行會召集人？

至於今年運程最差嘅就係肖鼠，只有凶星歲破，冇吉星化解，「犯破之年，凡事謹慎」。屬牛嘅港視主席王維基馬年運程都較差，蔡大師話有凶星六害，會遭人陷害，受謠言困擾，睇港視7.1未開台就波折重重可見一斑，但蔡大師話好在肖牛者獲吉星玉堂化解，「貴人指引，小人道消」，呢位貴人會唔會係出手救佢嘅中移動呢？
政改三人組嘅林鄭月娥屬雞，馬年係「雖有小節，喜慶有餘」；另外兩位成員譚志源同袁國強都出生於1964年屬龍，「身運平常，防有外服」，似乎鐵三角組合來年運程頗暢順。蔡大師話其他生肖整體都唔錯㗎，正如兔有桃花，但有天喜星，變成「桃花帶喜，鸞鳳和鳴」；又如蛇有凶星病符，文昌吉星一到，「小病是福，終獲平安」；屬犬者則有官符凶星，幸有吉星地解，「官符有解，吉自天來」。
至於特區整體狀況，蔡大師話政治方面應該問題唔大，但平靜中隱藏殺機，稍有風吹草動，亦會引起燎原，好事變壞事，所以為政者應虛心納諫，但總結「馬年一定會好過之前嘅龍年同蛇年」。

mailto:[email protected]