中大校長劉遵義獲煲呔點兵晉身行會，唔少人報以噓聲，但佢隨即宣佈出年退休，八方聽聞中大校園頻傳歡呼聲，美中不足係校長仲有年半任期。劉遵義身為國際級經濟學家，𠵱家先獲煲呔賞識進入政府權力核心，同佢由細玩到大嘅好兄弟，好多人早就上晒位。

帶隊露營鑽木取火

據劉遵義透露，佢自細就同現任行會成員張建東、終審法院首席法官李國能一齊玩，因為當年佢係童軍隊長，張建東、李國能係隊員，小隊長則係現時中大副校長楊綱凱，「我當年仲有帶佢哋去露營，鑽木取火煮嘢食㖭！」
原來劉遵義同特區權貴早有淵源，難怪同聲同氣，但講到最熟嘅老友，不能不提前教統局局長李國章。劉遵義同李國章由幼稚園開始，小學、中學都係同班同學，升大學先分道揚鑣，兩人𠵱家仍然好老友，會出席對方家庭活動，又一齊參加舊生聚會，不過佢話讀書時啲舊事多已忘記，李國章係咪好曳，佢話「少少啦，我唔係好記得喇。」
李國章同劉遵義咁老友，難怪李國章唔做校長，就到劉遵義頂上，李國章唔做局長，又可以返中大掛單，中國人做乜都講guanxi，既然一早相熟，有位自然搵你入局。根據呢個人脈網絡，中大下任校長人選，可謂呼之欲出。

否認曾當台灣密使

劉遵義上位，人脈固然重要，家世顯赫亦係重點，佢祖父劉侯武曾任兩廣監察使，外公係國民黨元老于右任。由於佢喺貴州遵義出世，所以取名遵義，不過佢話呢啲歷史冇乜人知道，所以唔感到背負家族包袱。由於佢家庭背景，幾年前有傳佢為港府做「密使」，勸服當時做台北市長嘅馬英九唔好訪港，劉遵義否認呢個傳聞，但承認同馬英九係認識廿幾年老朋友，如果有機會，都希望邀請佢訪問香港，「如果佢唔係總統，我一定會邀請佢嚟啦。」
劉遵義另一威水史，係1961年會考獲9A1B，據報係最年輕兼首位9A狀元。重提呢個神話，佢卻話一場誤會，自己只敢認第二，唔敢認第一，因為據佢所知，早一年已有師兄考到9A2B。
mailto:[email protected]