「供平過租」已超過一個年代。租樓逾10年的李太，當初覺得樓價貴，身邊人又話樓市會回調，但等了又等，樓價也不回。租樓1年使超過40萬元，2年租金足夠畀首期買個上車盤。覺得幫人供樓不如自己供，2年前花逾2,000萬元買入長實（1113）與市建局合作發展的中環My Central一個低層3房單位。貿易戰、逆權運動令樓價跌，她相信只是短期影響，樓價長遠會升，「因為我買咗樓！」

李氏夫婦都是專業人士，李太從事金融業，李生亦薪高糧準。大學畢業投身社會後，租樓超過10年。她坦言，其實當年都有點能力上車，但沒有買，「都係等吓等吓咁啦，諗住睇定啲，等樓市回調，但一直都無回。覺得樓市會回，因為身邊周圍啲人都話好貴。」

租樓逾10年，租金及樓價均節節上升，「錯過咗時機，如果有機會，可以負擔到，應該買！（當年負擔到？）負擔到之餘，要勒緊褲頭，樣樣嘢都要睇住，所以無買到。」租過不少地方，2017年以約3.5萬元租住銅鑼灣大坑1個實用500方呎單位，「覺得幫人畀緊按揭，如果自己負擔到首期，不如自己供。」

2017年長實與市建局合作發展的中環My Central推出首批50伙，首批折實均價約2.9萬元。一邊租樓，一邊有做其他投資，她覺當時樓市熾熱，樓市持續供不應求，項目距離中環約10分鐘步程，極近公司，自住和投資都是不錯的選擇。「一路等樓市回，當時就覺得不如試吓抽啦，因為樓市一路都無回過，抱住試吓嘅心態。」她認為貴買貴賣，最終花約2,000萬元買入一個實用839方呎3房單位，而且樓盤位處中環，屬單幢樓，無論日後轉售或出租都有叫座力。她借5成按揭，若以利息2.375厘分30年還推算，月供約3.9萬元。

她記得當時坊間流傳炒籌，一個前籌賣100萬元，她相信真有其事，「而家2年後睇返，嗰100萬元係值得畀，因為樓價升咗。如果當時抽唔到又唔會買籌喎，唔知樓市會唔會繼續升，或者見頂，都唔知2年後收樓會係咩世界，好似而家咁有貿易戰，有個風險。所以抽唔到就唔買，抽到就照買。因為自住，唔係攞來炒，就算樓價跌，我都可以橫跨個樓市循環。」目前不單止貿易戰，還有逆權運動，她認為，樓市短期調整，長遠仍會升，然後笑着說：「因為我都買咗樓！」樓盤被指遭豬肉檔包圍，她說那是街市，不知幾方便買餸，但出自長實之手，她謂：「所以要搵驗樓師驗吓囉！」

驗樓評分77分 石材成致命扣分位

負責驗收單位是資深驗樓師詹濟南，他企在廚房相連士多房外的角位，指出地面石材與牆身出現一條罅，這種情況有機會是牆身傾斜，或地面石材裁剪不準確，結果拉尺度過後，證實是地面石材剪裁不準確。單位多處地面石材鋪工欠佳，廚房門框腳邊的地面石，「鋪到一嚿嚿，最好是沿門框邊切割，但咁嘅形狀好易斷。好多師傅怕工夫多就唔做，結果出來咁嘅效果。可以做好啲，索性瀄膠遮醜。而家畀人睇到雲石功夫唔夠班。」近廚房門的地面石有道弧形花痕，「之前門底有沙石，開門一拖拖花咗，而家要打磨地面。」

主人套房廁所氣窗有3個圓形印，是搬玻璃吸盤留低的痕迹，理應抹乾淨後才交貨。廁所企缸牆身石材之間掃口「唔單止粗糙，有啲地方離罅……掃口位好鬆，紙篤都散，隨時用水會入石背後。」詹sir遂向企缸內的石材灑水測試，約數分鐘後，企缸外的石材邊出現水珠，「即是話會（係）條罅導致水入雲石背。有時水入雲石背，之後落雲石底，慢慢滲出去，會令門框腳發黑，但而家做法好少少，門框腳吊腳，水落雲石，唔會整黑門框。」不過他補充，曾經有個單位石材罅入水，滲落地台後，隔1、2年後，近廁所門邊地板發黑。他建議發展商幫業主修補窿罅免除後患。

設計方面，主人房浴室坐廁安置於靠近走廊牆身，有別於一般背靠屬於外牆牆身的坐廁，令喉管直接延伸至單位外。目前情況，如果藏於走廊牆身的喉管淤塞，就要打爛地下石屎維修，所以使用時要注意勿亂丟棄垃圾入坐廁沖水。單位尚有部份空心磚、地板鬆、工作平台門漏風的問題，總分77分，詹sir認為，致命扣分位是石材，除了鋪工欠佳，主要是掃口位做得不好。他指，長實新盤評分近年都維持70至80分，間中有「6」字及「9」字頭分數。長實發言人回應，就上述單仕，承建商已全部執修完工。

記者:陳家雄

---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書